सिमा विवादपछि नेचा सल्यान ६ का जनताद्वारा निर्वाचन बहिष्कार!

Share on facebook
Share on google
Share on twitter
Share on linkedin
Share on whatsapp
सल्लेरी, सोलुखुम्बु, असार ७

साबिक तिङ्ला गाविस हाल नेचा सल्यान गाउँपालिका वडा नं ६ जनप्रतिनिधिविहीन बन्ने भएको छ।

आइतबार मनोनयन दर्ता गरेका नेपाली कांग्रेसका उम्मेदवार टङ्क कार्कीको वारेसनामाबाट उम्मेदवारी दर्ता भएपनि अयोग्य ठहरेपछि उम्मेदवारी रद्द भएको छ।

यस्तै, सोही वडाबाट दुई जनाले स्वतन्त्रबाट उम्मेदवारी दर्ता गराएका थिए। स्वतन्त्रबाट उम्मेदवारी दर्ता गराउनुभएका ज्ञानबहादुर राई र हर्कबहादुर विश्वकर्माले पनि आफ्नो उम्मेदवारी फिर्ता लिएपछि उक्त वडा जनप्रतिनिधिविहीन बन्ने भएको निर्वाचन अधिकृत आनन्दराज पन्तले जानकारी दिए।

तिङ्लावासीले आफूहरुको भावना विपरीत नेचासल्यान गाउँपालिकामा समाहित गरेकोप्रति असन्तुष्टी जनाउँदै निर्वाचनमा भाग नलिने अडान राख्दै आएका थिए तर कांग्रेसबाट उम्मेदवारी दर्ता गराउन गएका टङ्क कार्कीलाई बाटैबाट तिङ्लावासीले नियन्त्रणमा लिएर दर्ता गराउन जान रोकेको भएपनि वारेसनामाबाट उम्मेदवारी दर्ता गरिएको थियो।

तर कार्कीको उम्मेदवारी रद्द भएपछि अन्य स्वतन्त्रबाट मनोनयन दर्ता गरेकाले पनि आन्दोलनलाई सहयोग गर्ने भन्दै फिर्ता लिएका छन्।

आफूहरुको माग पूरा नभएसम्म निर्वाचनमा भाग नलिने अडान राख्दै आएका तिङ्लावासीले निर्वाचनको अन्तिम घडीमा पनि अडान कायम राखेका छन्। निर्वाचनमा भाग नलिने यो सम्भवत नेपालमै पहिलो वडा हो। रासस