मेगा बैंकले सात दशमलव ८५ प्रतिशत लाभांश दिने

Share on facebook
Share on google
Share on twitter
Share on linkedin
Share on whatsapp
काठमाडौँ, १३ पुस

मेगा बैंक नेपाल लिमिटेडले शेयरधनीलाई शेयर लाभांशसहित सात दशमलव ८५ प्रतिशत लाभांश वितरण गर्ने प्रस्ताव गरेको छ ।

बैंकले आर्थिक वर्ष २०७४/७५ सम्म सञ्चित मुनाफा एवं वितरणयोग्य अन्य रकममध्येबाट हाल कायम चुक्ता पूँजीको छ दशमलव ८५ प्रतिशतले हुन आउने रु ७० करोड ४५ लाख ५८ हजार ५७० नगद लाभांश दिन लागेको जनाएको छ ।

त्यस्तै चुक्ता पूँजीको एक दशमलव ००२३३ प्रतिशतले हुन आउने रु १० करोड ३० लाख ९४ हजार ८७५ शेयर लाभांश दिन लागेको बैंकले जनाएको छ । तत्कालीन नेपाल लेखामान (GAAP) बमोजिम तयार पारिएको वित्तीय विवरणको आधारमा वितरणयोग्य मुनाफाको प्रतिशत दोहोरो अङ्कमा देखिए पनि नेपाल वित्तीय प्रतिवेदन मागबमोजिम वित्तीय विवरण तयार गर्दा मुनाफाको हिस्सा जगेडा तथा कोष सार्नु परेकाले सात दशमलव ८५ प्रतिशतमात्र लाभांश हुन आएको बैंकले जनाएको छ ।

नगद लाभांश र शेयर लाभांश गरी रु ८० करोड ७६ लाख ५३ हजार ४४६ लाभांश प्रस्ताव गरिएको बैंकले जनाएको छ । बैंक सञ्चालक समितिको २३७औँ बैठकले निर्णय गरेको लाभांश बाँड्ने प्रस्तावलाई नेपाल राष्ट्र बैंकलेसमेत स्वीकृति दिइसकेको छ । लाभांश वितरणलगायतका अन्य निर्णयका लागि बैंकले पुस ३० गते वार्षिक साधारणसभा आह्वान गरेको छ ।

बैंकको हालको चुक्ता पूँजी रु १० अर्ब २८ करोड ५५ लाख २६ हजार ५७८ रहेको छ । प्रस्तावित लाभांशपछि मेगाको चुक्ता पूँजी १० अर्ब ३८ करोड ८६ करोड २१ हजार ४५३ पुग्ने बैंकद्वारा जारी विज्ञप्तिमा जनाइएको छ ।

बैंकले अघिल्लो आवको पहिलो त्रैमासिक अवधिको तुलनामा चालू आवको सोही अवधिमा निक्षेप ६८ प्रतिशतले र कर्जा ७७ प्रतिशतले वृद्धि गरेको छ भने बैंकको मुनाफा ३९५ प्रतिशतले वृद्धि भई रु ४० करोड २५ लाख तीन हजार कायम भएको छ । रासस