सांसदद्वारा सरकारको ध्यानाकर्षण

Share on facebook
Share on google
Share on twitter
Share on linkedin
Share on whatsapp
काठमाडौँ, १२ फागुन

राष्ट्रियसभाको आजको बैठकको विशेष तथा सून्य समयमा भाग लिने सांसदले मेलम्ची खानेपानी, एनसेनका टावरमा भएको आक्रमण, सार्वजनिक जग्गाको संरक्षण र असिना पानीबाट इँट्टा उद्योगमा भएको क्षतिलगायत विषयमा सरकारको ध्यानाकर्षण गराएका छन् ।

बैठकमा पहिलो वक्ताका रुपमा भाग लिँदै कमलाकुमारी वलीले केही दिनअघि भएको असिना पानीबाट इँट्टा उद्योगमा ठूलो क्षति भएकाले उद्योगीलाई क्षतिपूर्तिको व्यवस्था गर्न माग गर्नुभयो । उहाँले भन्नुभयो, “सुदूरपश्चिममा वेतबाँसको व्यवसायीकरण गरियोस् ।”

प्रधानमन्त्री केपी शर्मा ओली र केही मन्त्रीबाट हालै भएको सुदूरपश्चिम भ्रमणका अवसरमा त्यस क्षेत्रमा विकासको गतिलाई अघि बढाउने अठोट गर्नु भएकाले जनतालाई उत्साही बनाएको भन्दै सांसद वलीले विकास र समृद्धिका कार्यक्रम अघि बढिरहेको बेला ठ्याप्पै काम नभएको जस्तो गरेर अफवाह फैलाइएको भन्दै गुनासो गर्नुभयो ।

सांसद बद्रीप्रसाद पाण्डे वर्तमान सरकार गठन भएको एक वर्ष भइरहँदा मेलम्ची खानेपानीलगायत सरकार सञ्चालनको तौरतरिकाबारे धेरै प्रश्न उठेको बताउनुभयो । नेकपाका अगमप्रसाद बान्तवाले इलाम अस्पतालमा दरबन्दी अनुसारको चिकित्सकको व्यवस्था गर्न र अलैँचीको अर्गानिक परीक्षण गर्ने व्यवस्था गर्न माग गर्नुभयो ।

सांसद वृशेषचन्द्र लालले सन् १९५० को नेपाल–भारतबीच भएको सन्धिको पुनरवलोकन गर्नुपर्छ भनेर आवाज उठाइए पनि सीमा क्षेत्रमा रहेका जनताको प्रतिनिधित्व नेपाल भारत प्रबुद्ध व्यक्ति समूहमा नसमेटेर सीमा क्षेत्रका जनताको भावनालाई उपेक्षा गरिएको धारणा राख्नुभयो ।

सांसद रामनारायण विडारीले मुलुकमा ५०औँ वर्षदेखि अस्तव्यवस्त पारिएको कुरालाई मिलाएर अघि बढ्नु आफैँमा चुनौती भए पनि वर्तमान सरकारले त्यसलाई व्यवस्थित र सन्तुलित ढङ्गबाट अघि बढिरहेको बताउनुभयो । रामलखन चमारले नवलपरासीको रामग्राम स्तुपा गौतमबुद्धको अस्थिधातु भएको एउटा मात्रै स्थान भएकाले त्यसलाई त्यसको संरक्षण र विकासका लागि बेग्लै कोष बनाइयोस् भनी माग गर्नुभयो ।

सांसद विमला आले रानाले प्रधानमन्त्री कृषि आधुनिक परियोजनाका पदाधिकारीबाट पदको दुरुपयोग गरेर राजनीतिक आस्थाका आधारमा आसेपासेलाई मात्र अनुदान दिने गरेको आरोप लगाउँदै त्यस परियोजनाबाट कृषक लाभान्वित हुन नसक्ने तर्क गर्नुभयो ।

सांसद विमला पौडेलले एनसेलमा तोडफोड र आगजनी कुनै राजनीतिक उद्देश्यबाट प्रेरित नभई आतङ्ककारी र आपराधिक घटनाका रुपमा भएको बताउनुभयो । उहाँले भन्नुभयो, “मुलुक भर्खर विकास र समृद्धितर्फ उन्मुख भइरहेको बेला भएको यस प्रकारका घटना एनसेलमाथि मात्र नभई समग्र निजी क्षेत्र माथिको आक्रमण हो, यो निन्दनीय छ ।”

विद्यार्थी अलपत्र पार्नेलाई कारवाही माग 

राष्ट्रियसभाको आजको शून्य समयमा भाग लिने सांसदले अस्ट्रेलियामा नेपाली विद्यार्थीलाई परेको मर्का, हरिसिद्धि इँट्टा तथा टायल कारखानाको दुरुपयोगलगायत विषयमा सरकारको ध्यानाकर्षण गराए ।

अनिता देवकोटा अस्ट्रेलियामा एआइविटीको कलेज खारेजीपछि सयौँको सङ्ख्यामा नेपाली विद्यार्थी अलपत्र परेकाले त्यस्तो कलेजमा पढ्न पठाउन सिफारिश गर्ने परामर्शदातालाई कारवाहीको दायरामा ल्याउन माग गर्नुभयो ।

सांसद उदय शर्माले सरकारले २५ वर्षअघि कौडीको मूल्यमा हरिसिद्धि इँट्टा तथा टायल कारखाना बेचे पनि न सरकारले पैसा पायो, न जनताले इँट्टा नै पाउन सके भन्दै यसबारे सत्यतथ्य सार्वजनिक गर्न सरकारसँग माग गर्नुभयो ।

खगेन्द्रप्रसाद पुरीले सल्यानलगायत मध्यपश्चिम र सुदूरपश्चिम क्षेत्रबाट सम्बन्धनका लागि सिफारिश भइआएका कलेजलाई त्रिभुवन विश्वविद्यालयबाट हालसम्म स्वीकृति प्रदान नहुनुको कारण के हो भनी प्रश्न गर्दै छिटो यो विषय टुङ्गोमा पुगोस् भन्नुभयो ।

सांसद तारादेवी भट्टले मुलुकको आर्थिक विकासका परिसूचक एवम् विवादित वक्तव्य र निर्माला हत्यामा संलग्न अपराधीलाई पत्ता लगाउन नसक्दा देशको अन्तरर्राष्ट्रिय छवि खस्केको बताउनुभयो । रासस