क्यान इन्फोटेक-२०२० का लागि ८० प्रतिशत स्टल बुकिङ

Share on facebook
Share on google
Share on twitter
Share on linkedin
Share on whatsapp
हिमाल दैनिक,
काठमाडौँ,

कम्प्युटर एशोसिएसन नेपाल (क्यान) महासंघले आयोजना गर्ने मुलुककै ठूलो सूचना प्रविधि सम्बन्धी प्रदर्शनी क्यान इन्फोटेक २०२० को तयारी अन्तिम चरणमा पुगेको छ ।

बुधबार काठमाडौंमा पत्रकार सम्मेलन गर्दै फागुन २ गतेदेखि ७ गतेसम्म काठमाडौंको भृकुटीमण्डपस्थित प्रदर्शनी हलमा हुने इन्फोटेकको तयारी अन्तिम चरणमा पुगेको जनाएको हो । २६ औं संस्करणको क्यान इन्फोटेकमा रहेका १७४ स्टलमध्ये ८० प्रतिशत स्टल बुकिङ भइसकेको जानकारी आयोजकले दिएको छ ।

यस पटकको क्यान इन्फोटेकको विशेषता इन्नोभेसन एक्सपोजर रहने छ । यस अन्तर्गत स्टार्टअप र इन्नोभेसनसँग सम्बन्धित व्यक्ति वा संस्थाले आफ्ना नयाँ प्रडक्टहरु र आइडियाको प्रदर्शनी गर्नेछन् । त्यस्ता सहभागीलाई क्यान इन्फोटेकमा विभिन्न सुविधाहरु र उत्कृष्टलाई नेश्नल आइसिटी डेको अवसर पारेर पुरस्कृत गर्ने घोषणा आयोजकले गरेको छ ।

प्रर्दशनीलाई व्यवसायीहरूले व्यापार विस्तारका साथै नयाँ–नयाँ प्रविधिको प्रदर्शनी गर्ने थलोका रूपमा उपयोग गर्न सक्नेछन् भने अवलोकनकर्ताले एकै थलोमा सूचना तथा सञ्चार प्रविधिका नौला प्रविधि र उपकरणको अवलोकन तथा खरिद गर्न पाउने आयोजकले जनाएको छ ।

पत्रकार सम्मेलनमा महासंघका महासचिव नारायण थापाले सूचना तथा सञ्चार प्रविधि क्षेत्रका कम्पनीहरुलाई आफ्नो बजार विस्तार गर्ने, ग्राहकका आवश्यकता थाहा पाउने, बजार सर्वेक्षण गर्ने, नयाँ उत्पादनहरु सार्वजनिक गर्ने र ग्राहकसँग आपसी सम्बन्ध स्थापना गर्ने अभूतपूर्व अवसर दिने बताए।

क्यान इन्फोटेक २०२० मा विभिन्न खण्डहरु रहने छन् जसमा ब्रान्डिङ, आईसिटी एक्ससरिज, गेम पार्लर, प्रडक्ट लन्चिङ, रोबोटिक्स, ई–बेस्ट म्यानेजमेन्ट, वाइफाइ, इन्टरनेट र लर्निङ सेन्टर, आईटी कलेजका विद्यार्थीद्वारा निर्माण गरेका प्रोजेक्ट तथा रोजगार केन्द्र हुने आयोजकले जनाएको छ । गत वर्ष करिब ३ लाख ७६ हजार भन्दा बढीले अवलोकन गरेको मेलामा यो वर्ष ४ लाख भन्दा बढी अवलोकनकर्ता आउने अपेक्षा गरिएको छ ।