मछिन्द्र फुटबल क्लब सहिद स्मारक ’ए’ डिभिजन लिग फुटबलको शीर्ष स्थानमा उक्लिएको छ। त्रिपुरेश्वरस्थित दशरथ रंगशालामा शनिबार भएको खेलमा विभागीय टिम एपीएफ क्लबलाई २–१ गोल अन्तरले पराजित गर्दै मछिन्द्र शीर्ष स्थानमा उक्लिएको हो। मछिन्द्रको जितमा विशाल राई र रञ्‍जित धिमालले एक एक गोल गरे। एपीएफका रमेश दंगालले एक गोल गरे। खेलमा सुरुवाती अग्रता उल्टाएर मछिन्द्रले जित निकालको हो। जितसँगै मछिन्द्रले १० खेलमा २२ अंक जोडेको छ । र, मछिन्द्रले दोस्रो स्थानको त्रिभुवन आर्मी क्लबमाथि २ अंकको अग्रता बनाएको छ। ९ खेलमा अर्को विभागीय टिम आर्मीको २० अंक रहेको छ। एपीएफ १० खेलमा ५ अंक जोडेर पुछारबाट दोस्रो स्थानमा रहेको छ। यस्तै शनिबार नै भएको पहिलो खेलमा थ्री स्टार क्लबले सरस्वती युथ क्लबविरुद्ध शानदार जित निकालेको छ। त्रिपुरेश्वरथित दशरथ रंगशालामा भएको खेलमा थ्री स्टारले रेलिगेशन क्षेत्रको सरस्वतीलाई ४–० गोलको फराकिलो अन्तरले पराजित गरेको हो। जितसँगै थ्री स्टार लिगको चौंथो स्थानमा उक्लिएको छ। थ्री स्टारले १० खेलमा १७ अंक जोडेको छ। पुछारको सरस्वतीले १० खेलमा ४ अंक जोडेको छ।