पितृसत्तासँग हार खाएर उपसभामुख छोडेकी तुम्बाहाङफेले आज मन्त्री पदको सपथ खाँदै

हिमाल दैनिक शुक्रबार, फागुन २, २०७६

सभामुख पदमा अत्तो थापेर प्रतिनिधि सभालाई करिब डेढ महिनासम्म बन्धक बनाएकी निवर्तमान उपसभामुख शिवमाया तुम्बाहाङफे मन्त्री हुने भएकी छिन्। तत्कालिन सभामुख कृष्णबहादुर महरामाथि यौन दुराचारको आरोप लागेर पदमुक्त भएपछि उक्त पदका लागि आफू योग्य भएको भन्दा संविधान र कानून बमोजिम सत्तारुढ नेपाल कम्युनिष्ट पार्टीको तर्फबाट सभामुख पदको उम्मेदवारी बनाउने विषयमा पुस ४ गतेदेखि माघ १२ गतेसम्म सदनलाई अनिर्णयको बन्दी बनाएकी तुम्बाहाङफेलाई प्रधानमन्त्री केपी शर्मा ओलीले आज कानून, न्याय तथा संसदीय मामिला मन्त्री पदमा नियुक्त गर्ने तयारी गरेका छन्। प्रधानमन्त्री ओलीका प्रेस सल्लाहकार सूर्य थापाका अनुसार, नेकपा सांसद तुम्बाहाङफेलाई आजै अपरान्ह ३ः३० बजे राष्ट्रपति भवनमा मन्त्री पदको सपथ दिलाउने तयारी भइरहेको छ। पूर्व माओवादीको तर्फबाट सभामुख बनेका महरामाथिको आरोप पश्चात रिक्त भएको पदमा नेकपाका द्वितीय अध्यक्ष पुष्पकमल दाहालले पूर्व माओवादीकै नेता तथा वर्तमान सभामुख अग्निप्रसाद सापकोटालाई अघि सारेपछि पूर्व एमाले र सरकारको नेतृत्वले अवरोध श्रृजना गर्न तुम्बाहाङफेलाई मोहोराको रुपमा प्रयोग गरेको थियो। लामो समयसम्म विवाद भएपछि अन्ततः प्रधानमन्त्री केपी शर्मा ओली दाहालको प्रस्ताव बमोजिम सापकोटालाई सभामुख बनाउन सहमत भएपछि तुम्बाहाङफेले उपसभामुख पदबाट राजीनामा दिएकी थिइन्।