लियोनल मेसी प्रेरित बार्सिलोनाले च्याम्पियन्स लिगमा बुधबार राति बोरुसिया डर्टमण्डलाई ३–१ ले हराउँदै नकआउट चरणमा पुगेको छ। बार्सिलोनाको जितमा लुईस स्वारेज, मेसी र एन्टोनी ग्रिजम्यानले समान एक एक गोल गरे। जाडोन साञ्चोले डर्टमण्डका लागि एक गोल फर्काए । लियोनल मेसीले बार्सिलोनाका जर्सीमा ७ सयौ खेल खेल्दा बार्सिलोना च्याम्पियन्स लिगको नकआउट चरणमा पुग्न सफल भएको हो। अर्जेन्टिनी फरवार्डले च्याम्पियन्स लिगमा १ सय १४ गोल गर्न सफल रहे। खेलमा अग्रता बार्सिलोनाले २९ औ मिनेटमा स्वारेजको गोलबाट लिएको थियो । उनले मेसीको पासलाई सदुपयोग गर्दै बार्सालाई अग्रता दिलाएका हुन् । त्यसको चार मिनेटपछि मेसीले घरेलु टोली बार्साको अग्रता दोब्बर पारेका थिए । उनले क्लबका लागि ६ सय १३ गोल गर्न सफल रहे । मेसीकै पासलाई सदुपयोग गर्दै ६७ औ मिनेटमा ग्रिजम्यानले बार्सिलोनाका लागि तेस्रो गोल गरे । युवा स्टार सान्चोले ७७ औ मिनेटमा पाहुना टोलीका लागि एक गोल फर्काए । समूह एफको शीर्ष स्थानको बार्सिलोनाले ५ खेलबाट ११ अंक जोड्यो । डर्टमण्ड ७ अंक सहित तेस्रो स्थानमा रह्यो ।