एजेन्सी – इटालियन सिरी ‘ए’ फुटबलमा साविकको विजेता युभेन्टस बराबरीमा राकिएको छ । युभेन्टस घरेलु टोली फियोरेन्टिनासँग गोलरहित बराबरीमा रोकिएको हो । प्रतिस्पर्धात्मक बनेको खेलमा दुवै टोलीले गोल गर्ने मौका पाएपनि सदुपयोग गर्न नसक्दा खेल बराबरीमा रोकिदा अंक बाड्न पुग्यो । युभेन्टसका गोलरक्षक वजसिएच स्केजजेस्नीले उच्च प्रदर्शन गर्दै सम्भावित हार टारेका थिए । १५औं मिनेटमा घरेलु टोलीका फेडरिको चिसाको प्रहार युभेन्टसका गोलरक्षकले मुस्किले बचाएका थिए । ३१औं मिनेटमा फ्रान्क रिवेरीको प्रहार पनि गोलरक्षक वजसिएचले बचाए । ४१औं मिनेटमा डालबर्टको प्रहार गोलरक्षक वजसिएचले मुस्किलले बचाउदै सम्भावित गोल टारेका थिए । ५३औं मिनेटमा वजसिएचले अर्काे प्रहार विफल पारेका थिए । ८५औं मिनेटमा रोनाल्डोले गोलको सुन्दर मौका खेर फाल्दा युभेन्टसले अग्रता लिनबाट चुक्यो । त्यसपछि थप गोल निस्कन नसक्दा खेल गोलरहित बराबरीमा सकियो । बराबरीसँगै युभेन्टसले शीर्षस्थानको इन्टर मिलानसँग अंक बराबरी गर्ने मौका गुमाएको छ । युभेन्टसको ३ खेलबाट ७ अंक छ । फियोरेन्टिना १ अंक जोडेर १६औं स्थानमा छ ।