एजेन्सी – म्यानचेस्टर सिटीका मिडफिल्डर केभीन डे ब्रुएनले उत्कृष्ट प्रदर्शन गरेपछि युरो २०२० छनोट अन्तर्गत सोमबारको खेलमा बेल्जियमले स्कटल्यान्डलाई ४-० को फराकिलो अन्तरले पराजित गरेको छ । बेल्जियमको जितमा डे ब्रुएनले एक गोल र ३ असिस्ट प्रदान गरेका थिए । छनोटमा लगातार छैटौं जित दर्ता गर्ने क्रममा बेल्जियमले पहिलो हाफमा नै ३-० को अग्रता कायम गरेको थियो । खेलको नवौं मिनेटमा रोमेलु लुकाकुले बेल्जियमलाई अग्रता दिलाए । अन्तर्राष्ट्रिय करिअरको ४९ औं गोल गर्ने क्रममा लुकाकुले डे ब्रुएनको पासलाई सदुपयोग गरे । थोमस भर्मालेनले २४ औं मिनेटमा बेल्जियमको अग्रता दोब्बर पारे । डे ब्रुएनले दायाँ विंगबाट दिएको क्रसलाई भर्मालेनले पहिलो टचमा नै गोलमा परिणत गरे । ३२ औं मिनेटमा टोबी एल्डरवेरल्डको गोलमा बेल्जियमले ३-० को अग्रता लियो । उनले डे ब्रुएनको कर्नरमा गरेको हेडर स्कटल्यान्डका गोलरक्षक मार्शलले बचाउन सकेनन् । खेलको ८२ औं मिनेटमा लुकाकुको पासमा डे ब्रुएनले उत्कृष्ट गोल गर्दै बेल्जियमको जित पक्का गरे । खेल अवधिभर ब्रुएनले सबै पक्षमा राम्रो प्रदर्शन गरे । अन्तिम समयमा उनले गोल गर्नुले पनि म्यान अफ द म्याचको पूर्ण हकदार भएको प्रष्ट पार्यो । यसै समूहको अन्य खेलमा रसियाले काजकस्तानलाई १-० ले पराजित गर्यो । मारियो फर्नान्डेसले ८९ औं मिनेटमा गोल गरेपछि रसियाले घरेलु मैदानमा रोमान्चक जित दर्ता गरेको हो । अर्को खेलमा साइप्रसले सान मारिनोको मैदानमा ४-० को जित हात पार्यो । साइप्रसको जितमा इआनिस कौसोलासले २ तथा फोतिस पापौलिस र कोस्टाकिस अर्तिमातासले १-१ गोल गरे । यस नतिजासँगै समूह ‘आई’ मा बेल्जियम ६ खेलमा १८ अंकसहित शीर्षस्थानमा छ । रसियाले ६ खेलमा ५ जितसहित १५ अंक जोडेको छ । कजाकस्तान र साइप्रसले समान ७-७ अंक जोडेका छन् भने स्कटल्यान्डको ६ अंक छ । सान मारिनोले हालसम्म सबै खेलमा पराजय बेहोर्दै कुनै गोल गर्न सकेको छैन ।