युरो कप छनोट अन्तर्गत स्पेनले फरो आइल्यान्डमाथि ४-० को फराकिलो जित दर्ता गरेको छ । आइतबार भएको खेलमा स्पेनलाई जिताउन रोड्रिगो र पाको अल्कासेरले २-२ गोल गरे। खेलको १३ औं मिनेटमा नै मिकेल ओराजबालको पासमा रोड्रिगोले गोल गर्दै स्पेनले सुरूवाती अग्रता लिएको थियो। स्पेनले बलमा पकड जमाउँदै थप आक्रमण गरेपनि पहिलो हाफमा गोल थप्न भने सकेन । दोस्रो हाफको सुरुवातमै रोड्रिगोले स्पेनको अग्रता दोब्बर पारे। खेलको दोस्रो हाफको इन्ज्युरी समयमा अल्कासेरले दुई गोल गर्दै फराकिलो जित पक्का गरेका थिए। वैकल्पिक खेलाडीका रुपमा मैदान छिरेका अल्कासेरले थियागो अलाकान्टराको पासमा पहिलो गोल गरे । लगत्तै जोसे गायनको पास सदुपयोग गर्दै ४-० को जित सुनिश्चित गरे । यस जितसँगै स्पेनले युरो छनोटको समूह एफमा शत प्रतिशत जित यात्रा कायम राखेको छ। स्पेनले खेलेका ६ खेलबाट १८ अंक जोडेको छ‌। यस्तै तालिकामा स्वीडेनको ६ खेलमा ११ अंक तथा रोमानियाले ६ खेलमा १० अंक जोडेको छ । नर्वे ९ अंक माल्टा ३ अंक र अंकविहिन फरो आइल्यान्ड पुछारमा छन्।