दशैंका लागि नेपाल राष्ट्र बैंकले असोज १४ गतेदेखि नयाँ नोट वितरण गर्ने तयारी गरेको छ । यस वर्ष राष्ट्र बैंकले तीन सरकारी बैंकसहित निजी बैंकहरुबाट पनि रकम सटहीको व्यवस्था मिलाउन लागेको छ। राष्ट्र बैंकले प्रतिव्यक्ति ५, १०, २०, ५० र १०० दरका २० हजार रुपैयाँ उपलव्ध गराउने छ। गत वर्ष काठमाडौंस्थित राष्ट्र बैंकको बैंकिङ कार्यालयबाट मात्र सटहीको व्यवस्था गर्ने गरेको थियो। तर यसपटक सर्वसाधारणको सुविधाका लागि नेपाल बैंक, राष्ट्रिय वाणिज्य वैंक र कृषि विकास बैंकबाट पनि नयाँ नोट सटहीको व्यवस्था गर्न लागेको छ । नेपाल बैंकको काठमाडौं बैंकिङ कार्यालय, न्यूरोड, पाटन, कीर्तिपुर, बालाजु र भक्तपुरबाट सटही सुविधा पाउन सकिन्छ । त्यस्तै राष्ट्र वाणिज्य बैंकको सिंहदरबार, नयाँ बानेश्वर, विशालबजार, नक्साल, टेकु र सानोठिमी, शाखाबाट पनि नयाँ नोट साट्न पाइनेछ। कृषि विकास बैंकको रत्नपार्क, रामशाहपथ, गौशाला, कोटेश्वर र पाटनको मंगलबजारबाट नयाँ नोट साट्न मिल्ने व्यवस्था मिलाइएको छ। निजी बैंकहरुलाई भने निश्चित रकम मात्र उपलव्ध गराइने राष्ट्र बैंकले जनाएको छ।