ला लिगा अन्तर्गत एइबारविरुद्धको खेलमा एट्लेटिको मड्रिडले दुई गोलले पछि परेको अवस्थामा तीन गोल फर्काउन सफल भएको छ । मड्रिडस्थित घरेलु मैदानमा भएको खेलमा २० मिनेटभित्र एइबारले दुई गोल गरिसेकेको थियो । तर, घरेलु टिमले तीन गोल गर्दै तीन अंक जोड्न सफल भयो । सातौं मिनेटमा चाल्र्सले र १९औं मिनेटमा अर्विल्लाले गोल गर्दै एइबारलाई सुरुवातमै २–० को अग्रता दिलाएका थिए । २७औं मिनेटमा डिएगो कोस्टाको पासमा हाओ फिलिक्सले गोल गर्दैएट्लेटिकोलाई खेलमा फर्काए । दोस्रो हाफमा एट्लेटिकोले दुई गोल गरेका थियो । ५२औं मिनेटमा भिटोलोले गोल गरेपछि खेल बराबरीमा पुग्यो । ९०औं मिनेटमा थोमस पाटीले गोल गर्दै एट्लेटिकोको जित सुनिश्चित गराए । ला लिगाको ती चरण सकिँदा शतप्रतिशत जित निकाल्ने एकमात्र टिम एट्लेटिको मड्रिड बनेको छ । अर्को खेलमा ग्रानाडाले स्पान्योललाई ३–० ले हराएको छ । स्पान्योलको मैदानमा भएको खेलमा ग्रानाडालाई जित दिलाउनका लागि एन्टोनियो पुइरटास, कार्लोस फर्नाण्डेज र रामोन अजिजले गोल गरेका थिए।