सारापोभाविरुद्ध सेरेनाको सहज जित
सेरेना विलियम्स युएस ओपन टेनिसको दोस्रो चरणमा पुगेकी छन् ।
न्यू योर्कमा जारी प्रतियोगितामा विश्व टेनिसकै सर्वाधिक सफल खेलाडी सेरेनाले पूर्व विश्व नम्बर एक मारिया सारापोभालाई २–० को सहज सेटमा हराइन् ।
सारापोभाविरुद्ध पाँच एसेज प्रहार गरेकी सेरेनाले पाँचवटा ब्रेक पोइन्ट जितेकी थिइन् । उनले ६–१ र ६–१ को सहज जित निकालिन् ।
पाँचौं वरियताकी युक्रेनी खेलाडी एलिना भिटोलिना र अमेरिकी खेलाडी सोफिया केनिन वर्षको अन्तिम ग्राण्डस्लाम टेनिस युएस ओपनको दोस्रो चरणमा पुगेका छन् ।
आज भएको खेलमा भिटोलिनाले अमेरिकी खेलाडी ह्वाइट्नी ओसिगिवीलाई २–० को सोझो सेटमा हराइन् । पहिलो सेटमा ६–१ को जित निकालेकी भिटोलिनाले दोस्रो सेट ७–५ ले जितेकी थिइन् ।
घरेलु मैदानमा सोफिया केनिनले पनि प्रभावशाली जित निकालिन् । उनले आफ्नै देशकी कोको भान्डेविगेलाई २–० कै सेटमा पराजित गरिन् । पहिलो सेट ७–६ (७–४) को टाइब्रेकरमा जितेकी सोफियाले दोस्रो सेटमा ६–३ को सहज जित निकालिन् ।
प्रकाशित मिति: शनिबार, भदौ ७, २०७६
प्रतिक्रिया दिनुहोस्
थप समाचार
साताको लोकप्रीय
