स्पेनीस ला लिगामा साविक विजेता बार्सिलोनाले रियल बेटिसमाथि पाँच दुईको प्रभावशाली जित निकालेको छ । यो सिजनको पहिलो खेलमा नै स्तब्ध भएको बार्सिलोनाले बेटिस विरुद्ध उत्कृष्ट फुटबल खेल्न सफल भयो । उसको जितमा एन्टोइन ग्रिजमनले दुई गोल गरे । घरेलु मैदान क्याम्प नोउमा भएको खेलमा बार्सिलोनाले रियल बेटिसको एक गोलको अग्रतालाई एल्ट्याउदै पाँच गोल गरेको थियो । खेलको १५ औं मिनेटमा फिकिरको गोलमा बेटिसले अग्रता बनाएको थियो । तर ४१ औं मिनेटमा ग्रिजमले गोल गर्दै बार्सिलोनालाई बराबरीमा पुर्याए । यसै सिजन बार्सिलाेनामा आएका उनले घरेलु मैदानमा डेब्यु खेलमा नै आफ्नाे उत्कृष्ट खेल देखाउन सफल भए  । त्यसपछि ५० औं मिनेटमा फेरी सेर्गि रोबर्टोको पासमा ग्रिजमनले नै गोल गर्दै टिमलाई दुई एकको अवस्थामा पुर्याए । ५६ औं मिनेटमा काल्र्स परेजले गोल गरे भने ६० औं मिनेटमा जोर्डी अलावाले बार्साका लागि चौथो गोल गरे । यस्तै ७७ औं मिनेटमा अर्टुरो भिडालले ग्रिजमनको पासमा बार्सिलोनालाई पाँच एकले अगाडी राखे । ७९ औं मिनेट बेटिसका लागि लोरेन मोरोनाले एक गोल फर्काएपनि त्यसपछि अरु गोल हुन सकेन र बार्सिलोना पहिलो तीन अंक जोड्न सफल भयो । उसको अंक तालिकामा दुई खेलमा तीन अंक भएको छ । गएराति नै भएको अर्को खेलमा एट्लेटिको मड्रिडले लेगानेसलाई एक शुन्यले हरायो । उसको जितमा एकमात्र गोल भिटोलोले गरेका थिए ।