रोवर्ट लेवान्डोस्कीको दुई गोल सहयोगमा जर्मन च्याम्पियन बायर्न म्युनिखले जर्मन कपमा सहज जित दर्ता गरेको छ । सोमबार राति भएको खेलमा बायर्नले इनर्जी कटबसलाई उसकै मैदानमा ३–१ ले पराजित गर्दै विजयी शुरुवात गरेको हो । बायर्नको जितमा लेवान्डोस्कीले दुई तथा किङ्सले कोमानले १ गोल थपे । कटबसमा बरकान टाजले सान्त्वना गोल फर्काए । खेलको ३२औं मिनेटमा लेवान्डोस्कीको गोलबाट बायर्नले पहिलो हाफमा १–० को अग्रता लिएको थियो । ६५औं मिनेटमा कोमानले अग्रता दोब्बर पारे । ८५औं मिनेटमा लेवान्डोस्कीले व्यक्तिगत दोस्रो गोल गर्दै जित पक्का गरे । ९०औं मिनेटमा बरकानले गोल गरेपनि हार टार्न सकेन ।