'इटालियन सिरिए ए'मा एसी मिलनले पार्मालाई पराजित गरेको छ। गाए राति भएको खेलमा मिलनले पार्मालाई ३-१ को गोल अन्तरले पराजित गर्दै लिगको उपाधि जित्ने झिनो आशा कायम राखेको छ । खेल सुरु भएको ८ औं मिनेटमा नै ज्लाटान इब्राहिमोविचको पासमा एन्टे रेबिकले पहिलो गोल गरे। त्यस्तै खेलको ४४ औं मिनेटमा फ्रांक केइसीले गोल गर्दै पहिलो हाफमा नै अग्रता दोब्बर बनाए। त्यस्तै खेलको ६० औं मिनेटमा इब्राहिमोविचले रातो कार्ड खादै मैदानबाट बाहिरिए। स्वीडिस स्ट्राइकरले रेफ्रीसंग भनाभन भएपछि उनि मैदान बाट बहिरिएका थिए। त्यसको ६ मिनेट नबित्दै रिकार्डो गाग्लिओलोले एक गोल गर्दै खेलमा फर्किने प्रयास गरेपनि इन्जुरी समयमा राफायल लिओले थप एक गोल गर्दै जित सुनिश्चित गराए। मिलन ६३ अंक सहित लिगको दोश्रो स्थानमा रहेको छ । मिलन भन्दा ८ अंक माथि लिगको शिर्ष स्थानमा इन्टर रहेको छ। आज इन्टरले काग्लिअरीसंग सामना गर्दै छ।