प्रतिनिधिसभाको कार्यव्यवस्था परामर्श समितिको बैठकले प्रधानमन्त्री केपी शर्मा ओली विश्वासको मत लिन संसदमा आउँदा कोरोना संक्रमित सांसदहरुले पनि मतदान गर्न पाउने व्यवस्था गर्ने निर्णय गरेको छ । संसद भवन नयाँ बानेश्वरमा आइतबार बसेको परामर्श समिति बैठकले उच्च स्वास्थ्य सतर्कताका साथ कोरोना संक्रमित सांसदहरुलाई मतदान गर्ने व्यवस्था मिलाउने निर्णय गरेको एमाले मुख्य सचेतक बिशाल भट्टराईले जानकारी दिए । उनले एमालेबाट सांसद बनेका सवै सांसदहरु विश्वासको मतको पक्षमा उभिने दावी गरे । त्यस्तै उनले विश्वासको मत दिन अन्य दललाई आग्रह गरिनु स्वभाविक भएको धारणा राखे । बैठकपछि कांग्रेस प्रमुख सचेतक बालकृष्ण खाँणले बैठकलाई सुरक्षित र व्यवस्थीत रुपमा सञ्चालन गर्ने बिषयमा छलफल भएको बताए । खाँणले सोमबार नै विश्वासको मतका बिषयमा छलफल हुने र मतदान हुने जानकारी दिए । त्यस्तै माओवादी मुख्य सचेतक देव गुरुङले मतदानमा सवैलाई सहभागी गराउने र संक्रमित सांसदहरुलाई पनि संसद भवन ल्याउने व्यवस्था गरिने उल्लेख गरे। प्रधानमन्त्रीले विश्वासको मत लिनका लागि संसदको विशेष अधिवेशन सोमबार बोलाइएको छ । संसद अधिवेशनअघि गरिएको परीक्षणमा केहि सांसदलाई कोरोना संक्रमण पुष्टि भएको छ ।