यूरोकपको समुह 'ई'बाट स्पेन र स्विडेन अन्तिम १६ मा प्रवेश गरेको छ । बुधबार बेलुका भएको खेलमा स्पेनले स्लोभााकियामाथि ५ गोल गर्दै अन्तिम १६ मा आफ्नो स्थान पक्का गरेको हो । यस अघिको दुई खेल बराबरीमा खेलेको स्पेनले भने समुह चरणको अन्तिम खेलमा दमदार प्रदर्शन गर्दै आफ्नो स्थान अन्तिम १६ मा पक्का गरेको हो । एस्टोडियो ला कार्टुजामा भएको खेलमा स्पेन स्लोभााकियामाथि हाबी भएको थियो । स्लोभााकियाले दुई गोल भने उपहार स्वरूप स्पेनलाई दिएको थियो। खेलको ३० औं मिनेटमा स्लोभाकियाका डुब्राभ्काले आत्माघाती गोल गरेपछि स्पेनले अग्रता लिएको थियो। त्यस्तै पहिलो हाफको अतिरिक्त समयमा स्पेनका एमेरिक लापोर्टेले गोल गर्दै खेलमा दोब्बर अग्रता लिए। पहिलो हाफमा दोब्बर अग्रता लिएको स्पेन दोश्रो हाफमा थप ३ गोल गर्यो। खेलको ५६ औं मिनेटमा पाब्लो साराबियाले तेस्रो र ६७ औं मिनेटमा फेरान टोरेशले चौथो गोल गर्दै खेल ४-० मा पुराए। खेलको ७१ औं मिनेटमा स्लोभाकियाका जुराज कुक्काले अर्को आत्माघाती गोल गर्दै खेल ५-० मा पुराए। त्यस्तै सेन्ट पीटर्सबर्ग स्टेडियम समूह ई को अर्को खेलमा स्विडेनले पोल्याण्डमाथि ३-२ ले जित हात परेको थियो। खेलको दोश्रो मिनेटमा एमिल फोर्सबर्गले स्विडेनलाई अग्रता दिलाए । पहिलो हाफमा एक गोलको अग्रता लिएको स्विडेनले दोश्रो हाफको ५९ औं मिनेटमा अग्रता दोब्बर बनाए । फोर्सबर्गले देजन कुलुसेवस्की असिस्टमा ब्यतिगत दोश्रो गोल गरेका थिए । खेलको ६१ औं मिनेटमा र ८४ औं मिनेट पोल्याण्डका रोबर्ट लेवान्डोस्की दुई गोल गर्दै खेललाई बराबरीमा पुराए। तर खेलको अतिरिक्त समयमा विक्टोर क्लाएसनले अर्को गोल गर्दै खेल ३-२ मा समापन गरे। यससंगै स्विडेन ७ अंक सहित समूह विजेता र स्पेन ५ अंक सहित समुहको उपविजेता बन्दै यूरोकपको अन्तिम १६ मा प्रवेश गरेको हो। त्यस्तै स्लोभाकियाकाले ३ अंक र पोल्याण्डले १ अंक सहित समूह चरण बाट बाहिरिएको छ।