स्पेनिस ला लिगामा रियल म्याड्रिड बराबरीमा रोकिएको छ । आइतबार राति लेभान्टेको घरेलु मैदानमा भएको खेलमा रियल ३-३ गोलको बराबरी खेलेको हो । खेलको ५ औं मिनेटमा कप्तान करिम बेन्जेमाको पासमा ग्यारेथ बेलको गोल गर्दै खेलमा अग्रता दिलाएका थिए । पहिलो हाफमा लिएको अग्रता दोश्रो हाफमा भने कायम गर्न सकेन । खेलको ४६ औं मिनेटमा गोन्जालो मेरेलोको पासमा रोजरले गोल गर्दै खेल बराबरीमा पुराए । त्यस्तै खेलको ५७ औं मिनेटमा जर्ग डि फ्रुटोसको पासमा जोस काम्पानाले गोल गरेपछि लेभान्टे २–१ को गोल अन्तरले अग्रता लिएको थियो । तर, ब्राजिली विंगर फरवार्ड भिनिले लगातार दुई गोल गर्दै रियललाई हार बाट बचाएको थियो । खेलको ५९ औं मिनेटमा इडेन हाजार्डको स्थानमा मैदान छिरेका भिनीले खेलको ७३ औं मिनेटमा गोल गर्दै खेल बराबरीमा पुराए । उनले क्यासमिरोको पासलाई सदुपयोग गरेका थिए । त्यस्तै खेलको ७९ औं मिनेटमा रोवेरले गोल गर्दै लेभान्टेलाई ३-२ को अग्रता दिलाए । त्यस्तै खेलको ८५ औं मिनेटमा बेन्जेमाको पासमा भिनिले व्यक्तिगत दोश्रो गोल गर्दै खेललाई बराबरीमा पुराए । यस खेलसंगै रियलको ४ अंक र लेभान्टेको २ अंक बटुलेको छ।