इंग्लिस प्रिमियर लिगमा बहुप्रतिक्षित मानिएको लिभरपुल म्यानचेस्टर सिटी बिचको भिडन्तमा रोमाञ्चक बराबरी भएको छ । लिभरपुलको घरेलु मैदानमा भएको भिडन्तमा दुवै टीमले २-२ गोलको सनसनीपूर्ण बराबरी खेले । सबै चार गोल दोस्रो हाफमा सम्भव भयो । पहिलो हाफ गोलरहित बराबरी भएको खेलमा दोस्रो हाफमा लिभरपुलले साडियो मानेको गोलबाट अग्रता लियो । ५९ औं मिनेटमा मोहमद्ध सालहले मध्य भाग भन्दा केही अगाडिबाट दिएको आकर्षक पासलाई मानेले कुनै गल्ती नगरी गोलमा परिणत गर्दा घरेलु समर्थक उत्साहित भएका थिए । तर उसको अग्रता लामो समय टिक्न सकेन । १० मिनेट पछि नै सिटीका फिलिप फोडेनले गाव्रियल जेससको पासलाई अफ कर्नरबाट गरेको प्रहार गोलमा परिणत हुँदा सिटीले बराबरी गर्न सफल भयो । निकै रोमाञ्चक बनेको दोस्रो हाफमा पुन लिभरपुलले सालहको गोलबाट अग्रता लियो । ७६ औ मिनेटमा सालहले सिटीका डिफेन्डर बिट गर्दै गरेको प्रहार गोलमा परिणत भएको थियो । तर पुन सिटी खेलमा फर्कने क्रममा ८१ औ मिनेटमा बराबरी गर्न सफल भयो । केभिन डि ब्रुनेले गरेको शक्तिशाली प्रहार गोलमा परिणत हुँदा खेल २-२ को बराबरीमा सकिएको थियो । यससंगै बराबरीमा खेलेको लिभरपुल शिर्ष स्थानमा जाने मौका गुमाएको छ भने सिटिभने तेस्रो स्थानमा उक्लिएको छ । ७ खेल खेलेको लिभारपुर १५ अंक सहित दोश्रो स्थानमा रहेको छ । त्यस्तै १६ अंक सहित लिगको शिर्ष स्थानमा चेल्सी रहेको छ भने सिटि १४ अंक सहित लिगको तेस्रो स्थानमा रहेको छ।