चौंथो संस्करणको एभरेष्ट प्रिमियर लिग (ईपीएल) अन्तर्गत बिहीबार दोस्रो क्वालिफायर खेल हुँदैछ । कीर्तिपुरस्थित त्रिवि क्रिकेट मैदानमा हुने दोस्रो क्वालिफायरमा भैरहवा ग्लाडियटर्स र पोखरा राइनोजबीच प्रतिस्पर्धा हुनेछ । यो खेल सवा १२ बजे सुरु हुनेछ । शरद भेषवाकरको कप्तानीमा रहेको भैरहवा पोखरालाई हराउँदै लगातार चौथोपटक इपिएलको फाइनल खेल्ने दाउमा हुनेछ । भैरहवा एलिमिनेटरमा काठमाडौं किंग्स–११ लाई १६ रनले पराजित गर्दै दोस्रो क्वालिफायरमा प्रवेश गरेको हो । विनोद भण्डारीको कप्तानीमा रहेको पोखरा पनि भैरहवाको चुनौतीलाई पार लगाउँदै पहिलोपटक इपिएलको फाइनल पुग्न चाहन्छ । पोखरा भने पहिलो क्वालिफायरमा चितवनसँग ९ विकेटले पराजित भएर पनि दोस्रो क्वालिफायर खेल्ने मौका पाएको हो । यो सिजन भैरहवा र पोखरा दोस्रो पटक भिड्न लागेको हुन् । वर्षाको कारण समूह चरणको भेट नतिजाबिहीन सकिएको थियो । यो खेलको विजेताले उपाधिका लागि शनिबार चितवन टाइगर्सको सामना गर्नेछ । लिग विजेताले ५० लाख र उपविजेताले १५ लाख पाउने छन् ।