नेपाल बिद्युत प्राधिकरणका कार्यकारी निर्देशक कुलमान घिसिङले बिद्युत आपुर्तिको समस्या छिटै समाधान हुने बताएका छन । शनिवार बुटवलमा पत्रकारहरुसँग कुरा गर्दै घिसिङले विद्युत प्रशारण लाइन तथा सव स्टेशनहरुको समस्याका कारण अहिले देखिएको विद्युत आपूर्तिलाई छिट्टै समाधान गरी भरपर्दो विद्युत सेवा उपलब्ध गराउन लागेको बताएका हुन् । उनले उत्पादन भएका विद्युतलाई सकेसम्म नेपालभित्रै खपत गर्ने बताउदै उद्योगहरुले मागे जति विद्युत उपलब्ध गराइने बताए । त्यस्तै उनले उद्योग, विद्युतीय सवारीको प्रयोग तथा खाना पकाउनका लागि इन्डक्सन चुल्होको प्रयोगलाई प्रोत्साहन गर्ने गरी शुल्कमा समेत छुटका व्यवस्थालाई जोड दिने बताए । घिसिङले सवस्टेसन निर्माण र केही ट्रान्समिसन लाईन विस्तार भइरहेकाले अहिले परिक्षण स्वरुप भारतमा विद्युत बिक्री गरिएको बताए। घिसिङले विद्युत विस्तार तथा संरचना निर्माणमा ऐन,कानून नै बाधक भएकोले काम गर्न समस्या हुनुका साथै लागत समेत वृद्धि हुने देखिएको धारणा पनि राखे ।