संघीय संसदमा प्रतिनिधित्व गर्ने दलहरुले अमेरिकी सहयोगसम्बन्धी सम्झौता मिलेनियम च्यालेन्ज कम्प्याक्ट (एमसीसी)लाई यथावस्थामा पारित गर्न नहुने सुझाव दिएका छन् । आइतबार प्रधानमन्त्री निवास बालुवाटारमा प्रधानमन्त्री शेर बहादुर देउवाले बोलाएको सर्वदलिय बैठकमा सहभागी विभिन्न दलका नेताहरुले एमसीसीका बिषयमा देखिएका जटिलतालाई संशोधन नगरि अघि नबढाउन सुझाव दिएका हुन् । बैठकमा कांग्रेसले एमसीसी अघि बढाउन प्रस्ताव गरेको थियो भने नेकपा माओवादी केन्द्र र नेकपा एकीकृत समाजवादीका नेताहरुले यथावस्थामा एमसीसीलाई अघि बढाउन नहुने बताएका थिए । त्यस्तै बैठकमा जसपाका अध्यक्ष डाक्टर बाबुराम भट्टराईले एमसीसी मुलुकको हितमा भएकाले पारित गरेर अघि बढ्नुपर्ने बताएका थिए । बैठकपछि नेपाल मजदूर किसान पार्टीका नेता प्रेम सुवालले सरकारका प्रवक्ता ज्ञानेन्द्र बहादुर कार्की र कांग्रेस नेताहरु रामचन्द्र पौडेल तथा रामशरण महतले एमसीसी पास गर्नुपर्ने बताएको तर माओवादी केन्द्रका नेता नारायणकाजी श्रेष्ठ र नेकपा एसका महासचिव बेदुराम भुसालले तत्काल यसलाई अघि बढाउन नहुने धारणा राखेको जानकारी दिए । सुवालले एमसीसी विष जस्तै भएको भन्दै त्यसलाई खारेज गर्नुपर्ने आफुहरुको भनाई रहेको बताए । उनले प्रतिपक्षीले अवरोध गरेका बेला संसदको कार्यसूची अघि बढाउन नहुने धारणा राखेको जानकारी दिए । त्यस्तै बैठकपछि सरकारका प्रवक्ता कार्कीले केही राजनीतिक दलले एमसीसी सम्झौताप्रति आशंका व्यक्त गरेकाले सबै विषयमा छलफल गरेर चाँडै निष्कर्षमा पुग्नुपर्ने बताए । बैठकले संसद् अवरोध हटाउन प्रमुख प्रतिपक्ष नेकपा एमालेसँग आह्वान गरेको छ । बैठकमा कांग्रेस, माओवादी, एकीकृत समाजवादी, राष्ट्रिय जनमोर्चा र जसपाका नेताहरु सहभागी भएपनि एमालेका कुनै नेताहरु पनि सहभागी भएनन् । सन् २०१७ मा नेपाल र अमेरिकाबीच भएको झन्डै ६० अर्ब रुपैयाँ बराबरको आर्थिक अनुदान सम्झौताका बिषयमा दलहरुबीच मतभेद भएपछि अघि बढ्न सकेको छैन ।