नेकपा एकीकृत समाजवादीका अध्यक्ष माधवकुमार नेपालले जनतालाई विश्वासमा लिएर मात्र एमसीसीलाई अघि बढाउनुपर्ने बताएका छन् । बुधबार रौतहटको वृन्दावन नगरपालिका ५ स्थित स्वास्थ्य चौकीको उद्घाटन गर्दै नेता नेपालले एमसीसी सम्झौताका बिषयमा सरकारसँग छलफल भईरहेको भन्दै जनतालाई विश्वासमा लिएर मात्र एमसीसी लाई अघि बढाउनुपर्ने बताएका हुन् । एमसीसीका बहानामा कुनै प्रकारको सुरक्षा रणनीति सम्बन्धी कार्य वा छिमेकी देशको विरुद्ध हुने गतिविधी स्वीकार गर्ने पक्षमा आफुहरु नरहेको उनले बताए । अध्यक्ष नेपालले नेपालको भूमिमा नेपालको अधिकार भएकोले आफ्नो भुमिमा विकास कार्य, रोजगारी सृजना तथा प्रयोग गर्ने नेपालकै भएको तर्क गरे । उनले तत्कालिन प्रधानमन्त्री केपी शर्मा ओलीले बिभिन्न समयमा गरेका सम्झौताले नेपाललाई अप्ठेरोमा पारेको आरोप पनि लगाए ।