भौतिक पूर्वाधार तथा यातायात मन्त्रालयले बीपी राजमार्ग दशैं अगाडि पूर्णरुपमा सञ्चालन हुन नसक्ने जनाएको छ।

बिहीबार सिंहदरबारमा पत्रकार सम्मेलन गर्दै मन्त्रालयले बीपी राजमार्गको चौकी डाँडादेखि कालढुंगा खण्डमा बाढीका कारण सडक नै बगाएकाले दशैं अगाडि पूर्णरुपमा सञ्चालन हुन नसक्ने जनाएको हो।

त्यसको बिकल्पका रुपमा अन्य रुटहरुलाई सहज ढंगले सूचारु गर्ने काम भइरहेको मन्त्रालयका सचिव केशवकुमार शर्माले जानकारी दिए।

सो सडक–खण्डमा पहाड काटेर सडक बनाउने अवस्था नरहेको र सडक बनाउनका लागि पर्खाल नै उठाउनुपर्ने देखिएको उनले बताए।

उनले बाढीका कारण बीच बाटोमा फसेका सवारीसाधानलाई निकाल्नका लागि खोला किनारमा नै अस्थायी सडक निर्माणको काम भइरहेको जानकारी दिए।

दशैअघि उपत्यका बाहिरिने अन्य राजमार्गहरु सूचारु हुने उनको भनाइ छ। शर्माले बाढीका कारण ८ स्थानका पुलमा क्षति भएको र सम्भव भएका स्थानमा बेलिब्रिज राख्ने तयारी भइरहेको जानकारी पनि दिए।

त्यस्तै भौतिक पूर्वाधार तथा यातायात मन्त्री देवेन्द्र दाहालले बाढीका कारण बीपी राजमार्ग अहिलेको जस्तो क्षति हुने कल्पना पनि नगरिएको बताए।

उनले बाढीका कारण अवरुद्ध सडक सूचारु गर्न तीव्र रुपमा काम भइरहेको जानकारी दिए। मन्त्री दाहालले बिपदका बेला भाडादरमा हुने ठगि रोक्न निरन्तर अनुगमन हुने धारणा राख।

बर्षाका कारण आएको बाढीले ३४ वटा राजमार्गहरुका ८ सय ५ स्थानमा पहिरो गइ सडक अवरुद्ध भएकोमा ७७४ स्थानको पहिरो हटाई २९ वटा राजमार्गमा यातायात सुचारु गरिएको मन्त्रालयले जनाएको छ।

अझैपनि ५ वटा मुख्य राजमार्गका ३१ स्थानमा सडक अवरुद्ध भएको मन्त्रालयले जनाएको छ। जसअनुसार अरनिको राजमार्गको लार्चा–कोदारी खण्ड, बिपि राजमार्गको चौकीडाँडा–कालढुङ्गा खण्ड, पुष्पलाल मध्यपहाडी मार्गको दोलालघाट–राकथुमखण्ड, कान्ती राजपथको घपेली–बगुवाखण्ड र मेचि राजमार्गको रमिते–फिदिमखण्ड अवरुद्ध छन्।

बाढीले बगाएका सडक सूचारु गर्नका लागि अस्थायी संरचना बनाउन मात्र करिव ३ अर्व लाग्ने अनुमान मन्त्रालयले गरेको छ।