नेपाली कांग्रेसका नेता शेखर कोइरालाले अध्यादेशबाट देश चलाउने कार्य निरंकुशताको प्रस्थान बिन्दु भएको दाबी गरेका छन्।
जिपी कोइराला फाउण्डेशनले सोमबार भक्तपुरमा आयोजना गरेको राजनीतिक शिखर पुरुष गिरिजाप्रसाद कोइराला र वर्तमान राजनीति विषयक विचार गोष्ठीमा बोल्दै नेता कोइरालाले संसदलाई छलेर अध्यादेश ल्याउन जरुरत नै नदेखिएको भन्दै अध्यादेशबाट देश चलाउने काम निरंकुशताको प्रस्थान बिन्दु भएको बताएका हुन्।
उनले भने, ‘अध्यादेशबाट देश चलाउने काम जुन हामीले सुरु गर्यौँ, त्यो नेपाली कांग्रेसको कल्चरै होइन। किन भने, डेमोक्रेसीमा भरसके हामीहरुले संसदबाटै नियम, कानून, ऐनहरु बनाइकन अगाडि जानु पर्ने हुन्छ।’
उनले संसदलाई छलेर जान खोजिएको अवस्थाबारे स्पष्ट पार्दै उनले भने, ‘सरकारको पक्षमा दुई तिहाई बहुमत छ, संसदलाई छल्नु पर्ने जरुरत नै छैन। के को छैन?’
अहिलेको परिस्थितिमा कानून पारित गराउन राष्ट्रिय सभामा देखिएको संख्याको समस्याको बारेमा चर्चा गर्दै कोइरालाले यदी गिरिजाप्रसाद कोइराला भएको भए अरुसँग कुरा गरेर सबै कुरा मिलाइसक्ने दाबी पनि गरे।
‘त्यसैले अध्यादेशबाट देश चल्ने भनेको निरंकुशताको प्रस्थान विन्दु हो भन्ने मलाई लाग्दछ,’ कोइरालाले भने।
केही समयअघि कहिले नेकपा माओवादी केन्द्र र एमालेबिच त कहिले माओवादी र कांग्रेसबिच सत्ता साझेदारीतामा सरकारको अदलाबदली भइरहेको बेला कांग्रेस र एमालेबिच सत्ता गठबन्धन हुनु पर्छ भनि सार्वजनिक अभिव्यक्ति दिएका कोइरालाले आफ्नो उक्त अभिव्यक्तिको स्मरण गर्दै भने, ‘हुन त नेपाली कांग्रेस र एमालेबिच मिलेर सरकार बन्नु पर्छ भन्ने पहिलो व्यक्ति मै हो। तर, एमाले अथवा यो सरकारले गरेका गलत कामका बारेमा हामीले पब्लिकमा लग्न सक्नु पर्दछ।’
यसरी सरकारले गरेका गलत कामको बारेमा जनतामाझ लैजान नसके कांग्रेस कमजोर हुने धारणा उनले राखे।
कोइरालाले सरकारमा सहभागी कांग्रेसका मन्त्रीहरुले पनि यो कुरा बुझ्न नसकिरहेको गुनासो गरे।
सरकारले हालै संसदमा दर्ता गरेको सामाजिक सञ्जाल विधेयकको विषयमा प्रतिक्रिया दिँदै उनले सामाजिक संजालमा धेरै कुरा गलत र डिप फेक फैलाउने कार्य भइरहेको भन्दै त्यसलाई नियमन गर्ने कार्य उचित भएपनि नियन्त्रण गर्ने कुरा गलत भएको बताए।
उनले सरकारले ल्याएको उक्त विधेयक सामाजिक संजालमा गलत कुरा नियमन गर्ने भन्दा पनि अभिव्यक्ति स्वतन्त्रतामाथि नियन्त्रण गर्ने गलत उद्देश्यले ल्याइएको दाबी पनि गरे। उनले यसअघि प्रधानमन्त्री हुँदा ओलीका मन्त्री गोकुल बाँस्कोटाले ल्याएको कानूनी मस्यौदालाई नै अहिले अध्यादेशको रुपमा ल्याएको भन्दै त्यतिबेला गलत भएको कुरा अहिले कसरी सही मान्न सकिन्छ भनि प्रश्न पनि गरे।
उनले पार्टीभित्रको विषयमा कुरा गर्दै आफूले के गर्दा पार्टी बलियो हुन्छ त्यसका लागि आफू तयार भएको घोषणा पनि गरे।
उहाले दुई तिहाईको बलमा कांग्रेस–एमालेमात्रै संविधान संशोधन गर्न नहुने भन्दै यसका लागि माओवादी, मधेसवादी दल लगाएतका दलसंगको सहमतिका आधारमा अघि बढ्नुपर्ने बताए।
उनले संविधानमा केही कुरा परिवर्तन गर्न आवश्यक भएको भन्दै त्यसका लागि निर्वाचन प्रणालीमा महिला र दलितहरुका लागि निश्चित कोटा तोकेर उनीहरुबिच नै प्रतिस्पर्धा गराउन उपयुक्त हुने बताए।
त्यस्तै स्वास्थ्यमन्त्री प्रदीप पौडेलले अहिलेको व्यवस्थालाई थप बलियो बनाउने गरि आवश्यकताका आधारमा संविधान संशोधन हुनुपर्ने बताए।
संघीय सांसद, प्रदेश सांसद, मन्त्रीमण्डलको संख्या घटाउने, शिक्षा र स्वास्थ्यलाई प्राथमिकतामा राखेर संविधान संशोधन गर्नुपर्ने बताए।
उनले अहिलको अवस्थामा गिरिजाप्रसाद कोइरालाबाट सिक्ने कुरा धेरै रहेको बताए।
त्यस्तै कांग्रेसकी नेतृ सुजाता कोइरालाले कांग्रेस सभापति शेरबहादुर देउवाको कुनै विचार नै नभएको र पूर्णरूपमा असफल भएको दाबी गरिन्।
अहिले एमालेले देश हाकिरहेको र कांग्रेस छाँयामा परेको उनले पार्टी र सरकारको नेतृत्व शेखर कोइरालालाई सुम्पिन आवश्यक भएको भन्दै त्यसका लागि आफ्नो पूर्ण समर्थन रहेकोे बताइन्।
