परराष्ट्रमन्त्री आरजु राणा देउवाले हमासको नियन्त्रणमा रहेका नेपाली युवा विपिन जोशीको अवस्थाबारे यथार्थ जानकारी प्राप्त हुन नसकेको बताएकी छन्।
संयुक्त राष्ट्रसंघीय मानवअधिकार परिषदको ५८औँ उच्चस्तरीय सत्रमा भाग लिइ शुक्रबार स्वदेश फर्किएकी मनत्री राणाले त्रिभुवन बिमानस्थलबाट बाहिरिने क्रममा सञ्चारकर्मीहरुसंग कुरा गर्दै विपिन जोशीको बारेमा यथार्थ जानकारी प्राप्त हुन नसकेपनि रिहाइका लागि भने पहल गरिरहेको बताइन्।
डेढवर्ष अघि इजरायलमा भएको हमासको आक्रमणका क्रममा अपहरणमा परेका कञ्चनपुरका विपिन जोशीको विषयमा थप्दै भनिन्, ‘अब त्यो उहाँहरुले एक्ज्याक्ली उहाँको स्टाट्स के हो भन्नु भा छैन। सरकारबाट कुटनीतिक पहल भइरहेको भन्ने कुरा सबैजनालाई थाहा छ। र उहाँहरुले त्यो नोटिस पनि गर्नु भएको छ।’
जोशीको बारेमा नेपाल सरकारका अधिकारीलाई मात्र होइन, बेलायतस्थित नेपाली राजदूतलाई पनि बेला बेलामा उनको विषयमा खबर गरिरहेको बताउँदै हमासको कब्जामा नेपाली रहेको भए रिहाइ हुने आश्वासन अन्तर्राष्ट्रिय जगतबाट पाएको उनले बताइन्।
विपिन जोशीको रिहाइका लागि अधिकतम कुटनीतिक पहल गरिरहेको बताउँदै आएकी परराष्ट्रमन्त्री राणालाई पत्रकारहरुले थप प्रश्न गरेपछि असन्तुष्ट बन्दै भनिन्, ‘आशा गरौँ राम्रै होला (लेट्स होप फर दि बेष्ट)’ भन्दै बाहिरने क्रममा थपिन्, ‘अब यो भन्दा धेरै के गरुँ? प्लेन लिएर जाउँ?’
जेनेभाबाट स्वदेश फर्कने क्रममा कतारको दोहाबाट कतार एयरलाइन्सको जहाजबाट काठमाडौं आउँदै गरेकी परराष्ट्रमन्त्री राणा सवार जहाज काठमाडौंस्थित त्रिभुवन अन्तर्राष्ट्रिय विमानस्थलमा खराब मौसमका कारण अवतरण गर्न नसकेपछि भारतको कोलकातामा डाइभर्ट गरिएको थियो।
मौसमको सुधार पश्चात अपरान्ह २ः१० बजे काठमाडौं आइपुगेपछि विमानस्थलबाट बाहिरने क्रममा मन्त्री राणाले जेनेभामा भएको मानवअधिकार परिषदमा आफूले मानवअधिकार रक्षाका निम्ति नेपालको कमिटमेन्ट (प्रतिबद्धता) र नेपालले यसका लागि गरिरहेको काम कारबाहीबारे जानकारी गराएको बताइन्।
त्यसैगरी उनले मानवअधिकार रक्षाको सवालमा संविधानमै प्रतिबद्ध भएको उल्लेख गर्दै शान्ति प्रक्रियालाई टुंगोमा पुर्याउन आवश्यक सत्य निरुपण तथा बेपत्ता छानविन आयोग गठनको प्रक्रियामा रहेको जानकारी गराएको बताइन्।
त्यसैगरी नेपालले सन् २०२७–०२९ लाई नेपालले ह्युमन राइट्स काउन्सिलमा (क्यान्डिडेसी) सदस्यको उम्मेदवारी दिएको र यसका लागि नेपाललाई मत दिन सबैसँग आग्रह गरेको बताइन्।
जेनेभामा रहदा बिभिन्न देशका बिदेशमन्त्रीहरुसंग महत्वपूर्ण द्विपक्षीय भेटवार्ता गरेको बताइन्।
मन्त्री राणा ६ सदस्यीय नेपाली प्रतिनिधिमण्डलको नेतृत्व गर्दै गत शनिबार जेनेभा प्रस्थान गरेकी थिइन्।
