संसदीय परम्परा र अभ्यासमा कुनै पनि संसदीय दलको प्रमुख सचेतक र सचेतक भनेको उक्त दलको संस्थागत निर्णय पालना गर्ने, गराउने सन्दर्भमा अत्यन्त महत्वपूर्ण र जवाफदेही भूमिका रहन्छ।
जसले सम्बन्धित दलका सदस्यहरलाई आवश्यकता अनुसार, पार्टी निर्णय बमोजिम सदस्यहरुलाई सदनमा अनिवार्य उपस्थित हुन र पार्टी निर्णय अनुरुप कुनै पनि पनि प्रस्तावको पक्ष या विपक्षमा अनिवार्य मत जाहेर गर्न हिव्प अर्थात कोर्रा लगाउने र उनीहरुलाई अनुशासनको दायराभित्र राख्ने गर्दछ।
तर, पछिल्लो समय प्रतिनिधि सभामा रहेको सत्तारुढ दल नेपाली कांग्रेसका प्रमुख सचेतकको हकमा भने उल्टो भएको छ।
प्रमुख सचेतकको जिम्मेवारीमा रहेका सांसद श्यामकुमार घिमिरेका पछिल्ला अभिव्यक्तिका कारण उक्त पार्टीको संसदीय दलभित्र अनुशासनको पालना गराउन स्वयं प्रमुख सचेतक घिमिरेमाथि नै सम्बन्धित दलका नेतादेखि सदस्यसँगै अन्य दलका सदस्यहरुले समेत कोर्रा हिर्काएर सही बाटो देखाउनु परेको छ।
प्रतिनिधि सभाको चैत ३ गतेको बैठकमा विशेष समय लिएर बोल्ने क्रममा धार्मिक पर्यटनले मात्रै मुलुकले आयआर्जन गर्न नसक्ने भन्दै यसका लागि यौन व्यवसायसँगै गाँजा खेतिको वैधानिक बाटो खुला गरी यौन पर्यटनको प्रबद्र्धनमार्फत गरी राजस्व बृद्धि गर्न सकिने विवादस्पद अभिव्यक्ति दिएका थिए।
जसको सत्ता र प्रतिपक्षी दलका सदस्यहरुले सदनभित्रै र कांग्रेसका अधिकांश नेतादेखि महिला सदस्यहरुले पार्टी नेतृत्वसमक्ष आपत्ति प्रकट गर्दै उनीमाथि अनुशासनको कोर्रा लगाउन दबाब दिएपछि प्रमुख सचेतक घिमिरेले बुधबारको बैठकमा सार्वजनिक क्षमायाचना गरेका छन्।
बुधबारको प्रतिनिधि सभा बैठकमा विपक्षी दलबाट हुनसक्ने आलोचनालाई मत्थर पार्न घिमिरेले सभामुख देवराज घिमिरेसँग सुरुमै आकस्मिक समय लिएर बोल्दै आफ्नो नीजि धारणाले कुनै नकरात्मक प्रभाव परेको भए क्षमायाचना गर्छु भनेपनि उक्त धारणालाई संसदको रेकर्डबाट भने हटाउन कुनै आग्रह गरेनन्।
उनले भने, ‘यही चैत्र ३ गते विशेष समयमा मैले अभिव्यक्त गरेको धारणा एउटा संसदको हैसियतले विशेष सन्दर्भमा राखेको व्यक्तिगत धारणा हो। यो धारणा नेपाली कांग्रेस पार्टी र संसदीय दलको आधिकारिक धारणा पनि होइन। यी विचारहरुले सम्मानित संसदका सदस्यहरु एवं अन्य जनसमुदायमा समेत केही नकारात्मक प्रभाव परेको भए, म उहाँहरुको सम्मान गर्दै उहाँहरुसँग क्षमायाचना गर्न चाहन्छु। धन्यवाद।’
प्रमुख सचेतक घिमिरेले यसरी क्षमायाचना गरिरहँदा कांग्रेसका सांसदहरुले एकआपसमा मुखामुख गर्दै जिब्रो निकाल्दै आश्चर्य र लज्जाबोधको महसुस गरिरहेका थिए।
