नेपाली कांग्रेसकी नेतृ ईश्वरीदेवी न्यौपानेले गणतन्त्रको विरोध गर्दै राजतन्त्रको वकालत गर्ने राजावादी पार्टी र त्यसका नेतालाई पूर्व राजा स्वयंले समेत नपत्याएको दाबी गरेकी छन्।

प्रतिनिधि सभाको बुधबारको बैठकमा विशेष समय लिएर बोल्दै पछिल्लो समय संसदमा रहेको राष्ट्रिय प्रजातन्त्र पार्टी (राप्रपा)का नेताहरुले राजतन्त्र फालेर ल्याएको गणतन्त्र र यसका संचालकहरुले मुलुक ध्वस्त पारे, अब पूर्वराजा ज्ञानेन्द्र शाहलाई पुनःस्थापित गरी मुलुक जोगाउनु पर्छ भन्दै सुरु गरेको गतिविधि र त्यसपछिका परिदृश्यप्रति लक्षित गर्दे यस्तो धारणा व्यक्त गरेकी हुन्।

उनले भनिन्, ‘मलाई अचम्म लाग्यो सभामुख महोदय। त्यही भन्ने पार्टीका सांसदले जसरी बोल्नु भएको थियो, हिँजो मैले हेरेँ, उहाँले मान्ने भन्नु भएको राजाले पनि त विश्वास त गरेनछन् त उहाँका युवाहरुलाई। विश्वास त गरेनछ त उहाँका पार्टीहरुलाई।’

केही दिनअघि राजतन्त्रको स्थापनाका लागि गठित आन्दोलनको कमाण्डरका रुपमा विघटित राष्ट्रिय पञ्चायतका अध्यक्ष नवराज सुवेदीको चयन र त्यसपछि राजावादी समूहभित्र उत्पन्न विवाद र मतभेदबारे उनले कटाक्ष समेत गरिन्।

उनले थप्दै भनिन्, ‘कति वर्षको नेतृत्व हुनुहुन्छ अहिले आन्दोलनको नेतृत्व हाँक्ने भन्नु भएको व्यक्ति? जम्मा ८६ वर्षको? ८६ वर्षको नेतृत्वलाई नेतृत्व सुम्पिनु भएको छ। उहाँ आफू आउनका लागि हानथाप र मारामार भएर दुइटा दल जस्तो फरक फरक दुई समूहमा आन्दोलन गर्दैगरेको हामीले देख्यौँ।’

राप्रपाका सांसद ज्ञानबहादुर शाहीप्रति संकेत गर्दै कांग्रेस सांसद न्यौपानेले थपिन, ‘माननीयजीको दलको नेता जसलाई हामी सम्मान पनि गर्छौँ, उहाँ उपप्रधानमन्त्री पनि भइसक्नु भएको छ, पार्टीको नेता पनि हुनुहुन्छ सभापति पनि हुनुहुन्छ तर, उहाँलाई तल राखेर आन्दोलनको कमिटी बनाइएछ। उहाँले म बस्दिन भनेर भन्नु भयो।’

सांसद शाहीले राष्ट्रिय सभाका सदस्य र उक्त सदनलाई बृद्धाश्रम भनि गरेको टिप्पणीप्रति आपत्ति प्रकट गर्दै र सम्झाउँदै भनिन्, ‘त्यसकारण बोल्दै गर्दाखेरि हामीले अग्रजलाई कहाँ नेर सम्मान गर्ने? हामी युवाले के गर्ने? युवा हौँ भन्ने वित्तिकै सबैलाई जथाभावी बोल्ने कि? या हामीले कही न कही सम्मान गर्नु पर्ने पनि हुन्छ कि?’

राप्रपाका सदस्यहरुले दिनहुँ जसो गणतन्त्र स्थापनापछि मुलुक सबै हिसाबले चौपट्ट भएको भन्दै संविधान र व्यवस्था बदल्ने हुँकार गरिरहेको बेला सांसद न्यौपानेले प्रश्न गर्दै पञ्चायत कालमा जस्तो अहिलो व्यवस्थामा कसैलाई बोल्न अथवा चुनाव लडेर सांसद र जनप्रतिनिधि हुन निषेध नगरेको बताइन्।

पञ्चायत कालमा प्रधानमन्त्री, मन्त्री र सदस्य बनेकै व्यक्तिहरु प्रजातन्त्रिक कालदेखि गणतन्त्रमा समेत उपप्रधानमन्त्री, मन्त्री र सांसद बनेको यथार्थ बिर्सिएर सबै कुरा गणतन्त्रवादीहरुले बिगारे, अब राजतन्त्रले ठिक गर्छ भन्ने भाष्य निर्माण नगर्न पनि चेतावनी दिइन्।

यसका अतिरिक्त अहिले सबै बर्बाद भयो, राजाको कालमा यस्तो थिएन भन्दै कुर्लिरहेका राप्रपा सदस्यहरुलाई विगतका इतिहास पल्टाउँदै उनले विगतमा अहिले जस्तो आधुनिक प्रविधि र सूचनाको हक नभएपनि आफूले त्यतिबेला घटेका घटनाकोबारेमा गम्भीर प्रश्न पनि उठाइन्।

‘हाम्रो हातमा ल्यापटप, आइफोन र युट्युवहरु थिएनन् होला। तर, नमिता र सुनिता भन्ने काण्डले त पूरै देश थर्काएको होइन, त्यतिबेला? कसले घटाएको हो, नमिता, सुनिता काण्ड? जवाफ दिन सक्नु हुन्छ? पत्रकारलाई गोली के कारणले हानिएको थियो? जवाफ दिन सक्नु हुन्छ?,’ नेतृ न्यौपानले प्रश्नको ओइरो लगाइन्।

पञ्चायत कालमा देशका मठमन्दिर र पुरातात्विक महत्वका स्थानमा तत्कालीन राजदरबार र त्यसका सदस्यहरुले गरेको शक्तिको चरम दुरुपयोगको कथा नै सुनाइन्।

‘अनि हाम्रा पुरातात्विक संरचनाका पुरातात्विक चिजहरु भकाभक गायव भइरहेका थिए। मूर्तिहरु गायव भइरहेका थिए। त्यतिबेला त्यसको दोष कसलाई दिइन्थ्यो सभामुख महोदय? के त्यसको बारेमा आज भन्न सक्छौँ?,’ भन्दै उनले त्यतिबेला दरबार र दरबारका सदस्यहरुले आफ्नो स्वार्थका लागि नेपाल प्रहरीकै नेतृत्वलाई समेत दुरुपयोग गरेर तस्करी गरेको बताइन्।

उनले जुनसुकै व्यवस्थामा पनि राम्रा र खराब मानिसहरु हुने भन्दै एकाध खराब व्यक्तिलाई देखाएर व्यवस्थाविरुद्ध औला उठाउन नहुने तर्क पनि गरिन्।

उनले यही संविधान बमोजिम निर्वाचित भएर सांसदको भूमिका आइसकेपछि यसमा देखिएका कमिकमजोरी केलाएर आवश्यक परिमार्जन र संशोधन मार्फत जनताका भावना र चाहनालाई सम्बोधन गर्न सबै लाग्नु पर्नेमा पनि जोड दिइन्।

संविधानमा देखिएका केही त्रुटि या यसका संचालकमा देखिएका केही कमजोरीलाई देखाएर यसको सट्टा राजा गुहार्दै गरेकाप्रति प्रश्न गर्दै उनले भनिन्, ‘अनि राजाका वरिपरी, उनका भाई, भारदार, छोरा, छोरीको दशा के छ आज हेर्नुहोस् त! के त्यस्तैलाई ल्याउन खोज्नु भएको हो?’

साथै उनले संविधान र व्यवस्थाविरुद्ध उत्रनेहरुको उद्देश्य विफल पार्न गणतन्त्रका लागि लडेका शक्तिहरु सच्चिएर आत्मसमिक्षा गदै देश र जनताको हितमा काम गर्नु पर्ने अथवा राजनीतिबाट पाखा लाग्नु पर्ने बताइन्।