पूर्व राजा ज्ञानेन्द्र शाहले सत्ताच्यूत भएको १८ वर्षपछि पुनः आफ्नो नामको अगाडि श्री ५ महाराजधिराज र शाही निशान प्रयोग गर्न थालेपछि संसदमा त्यसबारे संसदमा विरोध भएको छ।

बिहिबारको प्रतिनिधि सभाको बैठकको सुरुमा आकस्मिक समय लिएर नेपाली कांग्रेसका सांसद रामहरि खतिवडाले नेपालको संविधानमा कहिँ कतै उल्लेख नभएको श्री ५ महाराजाधिरा र शाही निशाना पुनः प्रयोग हुने कार्य संविधान विपरित भएको भन्दै त्यसप्रति सरकारको ध्यानाकर्षण गराए।

गत फागुन ७ गतेको प्रजातन्त्र दिवसको अवसरमा अघिल्लो दिन राष्ट्रका नाममा सन्देश प्रवाह गर्ने क्रममा पूर्व राजा ज्ञानेन्द्र शाहले आफ्नो सम्बोधनको अगाडि श्री ५ महाराजाधिरा पदावली प्रयोगसँगै पुरानै शाही निशानाको प्रयोग गर्न थालेका थिए।

पछिल्लो समय उनको निजी सचिवालयबाट प्रेसित विज्ञप्तिमा समेत श्री ५ महाराजाधिराज र शाही निशानाको प्रयोग हुन थालेपछि आजको संसद बैठकमा कांग्रेस सांसद खतिवडाले यसप्रति घोर आपत्ति प्रकट गरे।

उनले भने, ‘मैले संविधान विपरित गरिएका कामप्रति सरकारको ध्यान आकृष्ट होस् भन्न चाहन्छु। पूर्व राजा ज्ञानेन्द्रले भर्खरै फागुन ६ गते दिएको भिडियो सन्देशमा श्री ५ महाराजधिराज भनेर उल्लेख गरिएको र शाही निशाना प्रयोग गरेको देखियो।’

दोस्रो जनआन्दोलन पश्चात पुनःस्थापित संसदको ०६३ जेठ ४ गतेको ऐतिहासिक घोषणामार्फत निलम्बनको स्थितिमा रहेको राजसंस्था पहिलो संविधान सभाको ०६५ जेठ १५ गतेको पहिलो बैठकबाट राजसंस्था र राजतन्त्रको अन्त्यसँगै शाही निशानाको प्रयोगमा बन्देज लागेको थियो।

तर, पछिल्लो समय जनतामा सरकारप्रति देखिएको असन्तुष्टि र वितृष्णालाई सिरानी हालेर पूर्व राजाले फेरि सक्रियता देखाउँदै पुरानै शैलीमा फर्किन थालेका थिए।

यसप्रति सशंकित बनेका गणतन्त्रवादी दलका नेता खतिवडाले थप्दै भने, ‘यो शाही निशाना २०६५ साल जेठ १७ गते हटाएर त्यहाँ राष्ट्रिय राखिएको थियो र नेपालको संविधानमा कहीपनि श्री ५ महाराजाधिराज भन्ने उल्लेख छैन। त्यसैले यस्तो सन्देश श्री ५ महाराजधिरा भनेर राख्ने र शाही निशाना झण्डा राख्ने कार्यप्रति घोर आपत्ति छ र सरकारले त्यस्ता कार्य नगर्न र संविधान नमिच्नका लागि आग्रह गर्दछु।’

साथै उलने पूर्व राजाको फागुन ६ गतेको भिडियो सन्देशमा प्रयोग भएको पदावली र शाही निशानप्रति लक्षित गर्दै भने, ‘उक्त भिडियो सन्देश मात्रै होइन, २०६५ साल जेठ १६ गतेका दिन शाही निशानाको झण्डा राजदरबारबाट हटाएर राष्ट्रिय झण्डा फहराइएको थियो। त्यो फहराइएको राष्ट्रिय झण्डालाई अपमान गरेर शाही निशाना फेरि प्रयोग गरिएको छ। यो संविधान कसले मान्ने हो?, कसले नमान्ने हो?, कुन वर्गलाई मान्न लगाउने हो? कुन वर्गलाई हो?, सरकारको ध्यान आकर्षित होस् र यस्ता कार्य बन्द होस भनि माग गर्दछु।’