शहरी विकास मन्त्रालयले आगामी २०८२ वैशाख २४ गतेभित्र त्रिभुवन विश्वविद्यालयस्थित कीर्तिपुर क्रिकेट मैदानमा प्याराफिट निर्माण कार्य सम्पन्न हुने गरि सहजीकरण भइरहेको जनाएको छ।
बिहीबार कीर्तिपुरस्थीत क्रिकेट मैदानको स्थलगत निरिक्षण गर्न पुगेको सरकारका उपप्रधान एवं शहरी बिकासमन्त्री प्रकाशमान सिंहले तोकिएको समयभित्रै प्याराफिट निर्माण हुनेगरी मन्त्रालयबाट समन्वय र सहजीकरण भइरहेको जानकारी दिए।
क्रिकेट मैदानमा प्यारापिट निर्माणलगायतका काममा प्रधानमन्त्री केपी शर्मा ओलीको पनि चासो रहेको भन्दै उनले समयमा नै कार्यसम्पन्न गर्न तीन सिफ्टमा काम भइरहेको बताए।
क्रिकेट नेपालको लोकप्रिय खेलको रुपमा बिकास भइरहेको अवस्थामा देशका अन्य स्थानमा पनि मैदान निर्माण गरेर अघि बढ्ने उनले बताए।
त्यस्तै खेलकुदमन्त्री तेजुलाल चौधरीले कीर्तिपुर क्रिकेट मैदानमा प्यारापिट निर्माण र फ्लड लाइट जडान कार्यको लागि पटक पटक बोलपत्र आह्वान गर्दा पनि सोचेजस्तो प्रस्ताव नआएकाले अर्थमन्त्रालयको समन्वयमा शहरी विकास मन्त्रालयलाई जिम्मा दिइएको बताए।
उनले सम्झौता अनुसार ठकेदार कम्पनीले समयमा नै कीर्तिपुर क्रिकेट मैदानमा प्याराफिट निर्माण गर्ने विश्वास व्यक्त गरे।
मन्त्री चौधरीले मूलपानी मैदानको निर्माण अघि बढाउन स्रोत सुनिश्चितताका लागि अर्थ मन्त्रालयमा फाइल पठाइएको जानकारी दिए।
कीर्तिपुर क्रिकेट मैदानमा अन्तर्राष्ट्रिय मापदण्ड अनुरूप १० हजार क्षमताको प्यारापिट निर्माण र फ्लड लाइट जडान कार्यको २०८१ फागुनमा सम्झौता भएको थियो।
