नेपाली कांग्रेसका नेता शेखर कोइरालाले पार्टीको महाधिवेशन समयमा नै सम्पन्न गर्न, गराउन नेतृत्वलाई दवाव दिन आग्रह गरेका छन्।
कांग्रेस मोरङ–काठमाडौं सम्पर्क समितिले शुक्रबार काठमाडौंमा आयोजना गरेको कार्यक्रममा कोइरालाले २०८२ साल मंसिर मसान्तभित्रै पार्टीको १५औं महाधिवेशन हुनुपर्ने भन्दै यसका लागि सबै तहका नेता, कार्यकर्ताले नेतृत्वलाई दवाव दिनुपर्ने बताए।
उनले भने, ‘पार्टीको अधिवेशन समयमै गराउन आजैदेखि तपाई, हामी सबैले आफ्नो आफ्नो स्थानबाट बोल्ने र लेख्ने काम सुरु गरौँ त, अधिवेशन ०८२ मंसिर भित्रै गर्न सकिन्छ, यसलाई कसैले टार्न सक्दैन।’
समयमा नै हुने महाधिवेशनले पार्टीलाई चलायमान बनाउने भन्दै उनले त्यसो हुन नसके पार्टी नै कमजोर भएर जाने दाबी समेत गरे।
महाधिवेशनमा को जित्छ वा हार्छ भन्ने कुरा आफ्नो ठाँउमा रहेको भन्दै कोइरालाले समयमा नै महाधिवेशन गरेर २०८४ को चुनावमा एकढिक्का भएर जानुपर्ने र एक्लै लड्नुपर्ने बताए।
उनले संघीय लोकतान्त्रिक गणतन्त्र ख्याल–ख्यालमा ल्याएको नभई नेपाली जनताले लडेर ल्याएको लोकतन्त्र कसैले खोस्न नसक्ने दाबी पनि गरे।
उनले लोकतान्त्रिक व्यवस्थामा निषेधको राजनीति गर्न खोजे लोकतन्त्र कमजोर हुने धारणा राख्दै सरकारमा रहेका दुई ठूला दलले राम्रा काम गर्दै अघि बढ्यो भने डराउनुपर्ने अवस्था नरहेको जिकिर गरे।
उनले संविधानमा पुनरावलोकन गरेर आवश्यकता अनुसार सुधार गर्नुपर्ने भएपनि त्यसमा ध्यान जान नसकेको भन्दै कांग्रेस नागरिकको पार्टी भएपनि अहिलेको समस्याको समाधानका लागि मियो बन्न नसकेको बताए।
कार्यक्रममा कांग्रेस नेता मीनेन्द्र रिजालले वर्तमान सत्ता गठबन्धनमा रहेका दुई ठूला दलले संसदीय जवाफदेहीतालाई भुलेर विधिको शासनमा विश्वास नगरी अध्यादेशको हुलमुलमा शासनसत्ता संचालन गर्ने कार्यले जनतामा सरकारप्रति अविश्वास उत्पन्न गरेको बताए।
साथै उनले सामाजिक संजाल विधेयकले नागरिकका गोपनियताका अधिकारमाथि अतिक्रमण गर्नेगरी सरकारले विधेयक ल्याएको भन्दै त्यसको विरोध गरे।
उनले अहिले केन्द्रदेखि वडातह र समाजका अन्य क्षेत्रमा गठबन्धनको नाममा सत्ता सञ्चालकले जनताका भावना र हितलाई ध्यान नदिई अघि बढे भने साँघुरो गल्लीबाट अगाडि बढ्दै गरेको संघीय लोकतान्त्रिक गणतन्त्र गल्लीबाहिर गएर दुर्घटनामा पर्न सक्ने बताए।
यसका लागि सत्तामा रहेका प्रमुख दुई दलले सबैमा विश्वास र भरोसा जगाउने गरी सबैलाई समेटेर संविधानका कमिकमजोरी हटाउन र मुलुक र लोकतन्त्रलाई सही बाटोमा हिडाउनु पर्नेमा जोड दिए।
कांग्रेसका अर्का केन्द्रीय सदस्य एनपी साउदले सत्ता गठबन्धनपूर्व दुई दलबिच भएको ७ बुँदे सहमतिको कार्यान्वयनका पक्षमा सरकार र सरकारमा सहभागी नेतृत्वले कुनै गम्भीरता नदेखाएको गुनासो गरे।
साथै उनले चुनावअघि जनतामा मत माग्ने क्रममा अघि सारेको चुनावी घोषणापत्र बमोजिम सरकार र पार्टी अगाडि बढ्न नसकेको भन्दै निर्वाचन अगाडि पार्टी अधिवेशन गर्न पनि माग गरे।
उनले कतिपय व्यक्तिहरुले निर्वाचनपूर्व पार्टी अधिवेशन गर्दा त्यसले चुनावमा असर गर्ने तर्क बेतुकको भन्दै विधानले तोकअनुसार समयमै अधिवेशन गराउनु पर्ने बताए।
