परराष्ट्रमन्त्री आरजु देउवा राणाले भारतीय पक्षले नेपालमा लोकतान्त्रिक प्रणाली विकल्प नखोजेको दाबी गरेकी छन्।
भारतको भ्रमण सकेर शुक्रबार स्वदेश फर्किएपछि त्रिभुवन बिमानस्थलमा पत्रकार सम्मेलन गर्दै मन्त्री राणाले भारतीय पक्षसँग राजनीतिक विषयमा धेरै कुराकानी नभए पनि नेपालमा लोकतान्त्रिक प्रणाली नै चाहेको आफुले महसुस गरेको बताइन्।
अहिले नेपाल सरकारसँग भारतीय निकायहरु जोडिरहेको भन्दै उनले सरकार नै परिवर्तन गर्ने आशय नदेखेको पनि जानकारी दिइन्।
परराष्ट्रमन्त्री राणाले भारतमा रहँदा भारतलगाएत अन्यदेशका बिदेशमन्त्रीहरुसंग द्विपक्षीय हित तथा आपसी चासोका विषयहरुमा छलफल भएको जानकारी दिइन्।
नेपाल र भारतबीच रहेका विभिन्न द्विपक्षीय संयन्त्रहरूको हालैका बैठकहरूमा भएका प्रगतिहरूको समिक्षा गर्दै अन्य संयन्त्रहरुलाई पनि थप क्रियाशील बनाउने र द्विपक्षीय सहयोगलाई अझ मजबुत बनाउने विषयमा समेत कुराकानी भएको उनले बताइन्।
उनले नेपालमा देखिएको विद्युत अभावको समाधानको लागि पनि कूटनीतिक प्रयास गरेको र नेपालमा आपूर्ति हुने विद्युतको परिमाणमा वृद्धि गर्न अनुरोध गरेको जानकारी पनि दिइन्।
त्यस्तै उनले अमेरिकाका राष्ट्रिय सुरक्षा परिषदका वरिष्ठ निर्देशक महामहिम रिक्की गिलसँग भएको भेटमा अमेरिकाले नेपाललाई दिदै आएको आवश्यक सहयोगको निरन्तरता हुन र विपिन जोशीको सकुशल रिहाईका लागि सहजीकरण गर्न आग्रह गरेको बताइन्।
त्यसैगरी युक्रेनी समकक्षीसँगको भेटमा यूक्रेनमा यद्धबन्दीको रुपमा रहेका ७ जना नेपाली नागरिकहरूको तत्काल रिहाइ र स्वदेश फिर्ताको सहजीकरणका निम्ति गरेको अनुरोध गरिएको र तत्कालै आवश्यक प्रक्रिया सुरु गर्ने प्रतिवद्धता प्राप्त भएको उनले बताइन्।
समग्रमा आफ्नो भ्रमणले भारत लगायत विभिन्न मित्र राष्ट्रहरुसँग रहेको द्विपक्षीय सम्बन्धलाई थप मजबुत र सुमधुर बनाउन मद्दत पुगेको उनको दाबी छ।
