प्रधानमन्त्री केपी शर्मा ओलीले वैधानिक प्रतिपक्षीको भूमिका यथार्थपरक र रचनात्मक हुन नसकेको भन्दै गुनासो गरेका छन्।
मंगलबार ललितपुरमा प्रोग्रेसिभ इन्जिनियर्स एसोसिएसन नेपालको राष्ट्रिय महाधिवेशन उद्घाटन गर्दै प्रधानमन्त्री ओलीले मुलुकमा विकास र समृद्धीको कार्यले गति लिएको हेर्न नचाहने देशी÷विदेशी तत्वहरुले अनावश्यक हल्ला फैलाएर सरकारलाई अलमल्याउन र अल्झाउन खोजिरहेको आरोप पनि लगाए।
उनले भने, ‘हामीले समृद्ध नेपाल, सुखी नेपालीको राष्ट्रिय आकांक्षालाई साकार पार्ने संकल्प बोकेका छौँ। केही मानिसहरु यस कुरालाई सफल हुन नदिनका लागि लागेका छन्, त्यो स्वाभाविक पनि हो। विरोधीहरु लाग्छन्।’
प्रमुख प्रतिपक्षीको भूमिकामा रहेको नेकपा माओवादी केन्द्रको नाम नलिई उक्त पार्टी र नेतृत्वको गतिविधिप्रति लक्षित गर्दै उनले भने, ‘वैधानिक प्रतिपक्ष, संवैधानिक प्रतिपक्षको भूमिका यथार्थपरक र रचनात्मक हुनु पर्ने हो तर, त्यस्तो भइरहेको छैन। त्यस्तो भइरहेको देखिदैन। कसरी सरकार वा आफूबाहेक अरुलाई कसरी बदनाम गर्न सकिन्छ, कसरी सत्यलाई ढाक्न सकिन्छ, झटलाई फैलाउन सकिन्छ भन्ने कुराहरुमा उहाँहरु बहुतै सक्रिय देखिनुहुन्छ।’
यसका बाबजूद आफू त्यस्ता कुराहरुमा धेरै अलमिलन पनि नचाहेको भन्दै आफूले देशको विकास गर्नु परेको र अनावश्यक कुराहरुमा आफूलाई घिसार्ने, अलमल्याउन र अल्झाउन कोशिशबाट अलग रहने बताए।
उनले देश ४६ सालको परिवर्तनपछि तिब्र विकासको बाटोमा अगाडि बढिरहेको दाबी गर्दै आफू प्रधानमन्त्री हुँदा भुकम्पले थलिएको मुलुकलाई विकास निर्माणको पूर्वाधार निर्माणदेखि पनुनिर्माणको दिशामा महत्वपूर्ण भूमिका निर्वाह गरेको दाबी पनि गरे।
देशी–विदेशी तत्व सरकारलाई बद्नाम गर्न र समृद्ध नेपाल सुखी नेपालीको राष्ट्रिय आकांक्षालाई सफल पार्न नदिनका लागि लागेको भन्दै उनले देशको बिकासका लागि लिएका नीतिलाई प्रभावकारी कार्यान्वयन गर्न सरकारको ध्यान केन्द्रीत भएको पनि बताए।
त्यस्तै प्रधानमन्त्री ओलीले देशको बिकासमा इन्जिनियर्सको भूमिका महत्वपूर्ण रहेको बताए।
