प्रधानमन्त्री केपी शर्मा ओलीले सरकारले वर्षौं लगाएर आयोजना निर्माण गरेका कारण मुलुकमा लोडसेडिङ अन्त्य भएको भन्दै यसका लागि कुनै एक व्यक्तिको देवत्वकरण नगर्न आग्रह गरेका छन्।
नेपाल विद्युत प्राधिकरणका निवर्तमान कार्यकारी निर्देशक कुलमान घिसिङलाई सरकारले पटक पटक सोधेका स्पष्टिकरणमा चित्तबुझ्दो जवाफ नआएपछि सोमबार मन्त्रिपरिषदको बैठकले उनलाई पदमुक्त गरेलगत्तै नेकपा माओवादी केन्द्रका अध्यक्ष पुष्पकमल दाहाल लगायतका नेताहरुले सरकारी निर्णयको विरोधमा व्यक्त गरेका अभिव्यक्तिप्रति लक्षित गर्दै प्रधानमन्त्री ओलीले यस्तो आग्रह गरेका हुन्।
मंगलबार बालुवाटारमा सुजता कोइरालाद्वारा लिखित ’म र मेरो सानोबुुबा’ (आत्मकथा) लोकार्पण गर्दै प्रधानमन्त्री ओलीले विगतमा मुलुक र मुलुकबासीले घण्टौँसम्म व्यहोर्दै आएको लोडसेडिङको अवस्थाको कसैका चमत्कारले नभइृ वर्षौं लगाएर गरिएका कामले बिजुली आएको बताए।
उनले कुलमान घिसिङले विजुलीे, चिम वा ट्रान्समिसन बोकेर आउनु भयो कि? भन्दै व्यंग्यात्मक प्रश्न गरे। त्यसक्रममा ओलीले प्रोमिथस्को कथा सुनाएर घिसिङलाई प्रोमिथस्को जस्तो देवत्वकरण नगर्न पनि सुझाव दिए।
कुलमानका बिषयमा माओवादी अध्यक्ष दाहालले मुलुकलाई अध्यारोबाट उज्यालो दिने व्यक्तिलाई हटाएको भनि भ्रम छरेको भन्दै ओलीले कुनै एक व्यक्तिले मात्रै अन्धकार हटाएको भन्ने भ्रममा नपर्न आग्रह समेत गरे।
ओलीले स–साना कुराहरुलाई समातेर हल्लाखल्ला गर्ने काम भएको जिकिर गर्दै अहिले आफुले सरकारको नायकत्व लिएको भन्दै केहि समयपछि कांग्रेस सभापति शेर बहादुर देउवाले सरकारको नायकत्व लिने बताए।
मन्त्रिपरिषदको सोमबारको निर्णयविरुद्ध पार्टीकै पदाधिकारीदेखि शीर्ष तहका नेता, कार्यकर्ताले चर्को आलोचना गर्दै विरोध जनाइरहेका बेला कांग्रेस सभापति शेरबहादुर देउवाले भने प्रधानमन्त्री ओली र सरकारलाई आफ्नो पार्टीको पूर्ण समर्थन रहेको बताए।
कार्यक्रममा कांग्रेसका सभापति शेरबहादुर देउवाले प्रधानमन्त्री केपी ओलीलाई पार्टीको तर्फबाट पूर्ण सहयोग रहेको बताए।
उनले विगतका लोकतान्त्रिक आन्दोलनका क्रममा ओलीसँगै जेल जीवन विताएको स्मरण गर्नेदेखि पार्टीबाट पूर्व सभापति गिरिजाप्रसाद कोइरालाले आफूलाई साधारण सदस्य समेत नरहनेगरी निकालेपछि नयाँ पार्टी बनाएको पछि पुनः कांग्रेससँग एकता गरेको बताए।
त्यसका अतिरिक्त देउवाले कोइराला एक जुझारु नेता रहेको भन्दै संगठन निर्माणमा कहिल्यै नथाकेको र आफूले उनीबाट धेरै कुरा सिक्ने अवसर पाएको बताए।
उनले ओली नेतृत्वको सरकारलाई कांग्रेसको पूरापूर सहयोग रहेको र राम्रोसँग अगाडि जानेमा दुईमत नरहेको भन्दै सरकारको बचाउ पनि गरे।
कार्यक्रममा सहभागीहरुले नेपाली राजनीतिमा गिरिजाप्रसाद कोइरालाको योगदानको चर्चा गरेका थिए।
