नेपाल विद्युत प्राधिकरणका निवर्तमान कार्यकारी निर्देशक कुलमान घिसिङको वर्खास्तगीको विरोधमा प्रतिनिधि सभाको बैठकमा विपक्षी दलले अवरुद्ध गरेका छन्।
बुधबारको प्रतिनिधि सभाको बैठक सुरु हुनासाथ उभिएर विरोध जनाएका सम्पूर्ण प्रतिपक्षी दलका सांसदहरुले अवरुद्ध पारेपछि सभामुख देवराज घिमिरेले विपक्षी दलको तर्फबाट शक्तिबहादुर बस्नेतलाई बोल्न समय दिए।
माओवादी सांसद बस्नेतले विचौलियाको पृष्ठपोषणका लागि गठन भएको सरकारले बहुमतको दम्भमा घिसिङलाई स्पष्टिकरणको आवरणमा हटाएर अन्याय गरेको भन्दै त्यसको घोर विरोध गरे।
उनले घिसिङ जस्तो सक्षम कर्मचारीलाई चार महिनापछि विदा हुने अवस्थामा आफ्नो सरकारको आयू त्यतिसम्म पनि नजाने हो कि भन्ने आशंकामा उनलाई हटाएको भने।
घिसिङले आफ्नो कार्यकालमा गरेको कामको सम्मानको अलवा अपमानित गरेको भन्दै यसमा सरकारको हुकुमी र स्वेच्छाचारी आदेशको पालना नगरेको कारण नै उनलाई हटाएको आरोप लगाए।
यसैगरी उनले उद्योगहरुले नतिरेको बक्यौता नउठाउन सरकारले दिएको आदेश नमान्दा कारबाहीमा परेको भन्दै राज्यका निकाय कमजोर बनाएर आफ्नो नियन्त्रणमा राख्दै सर्वसत्तावाद लाद्ने बाटोमा लागेको सरकारको कदमबारे जनताको चासोप्रति आफूहरुको ध्यानाकर्षण भएको बताए।
उनले घिसिङको निस्कासनको निर्णय फिर्ता लिएर संसदलाई यसबारे प्रधानमन्त्रीले सदनलाई जानकारी नगराएसम्म सदन चल्न नसक्ने बताए।
त्यसपछि उभिएर विरोध जनाएका विपक्षी सांसदहरुलाई सभामुख घिमिरेले यसबारे आफ्नो ध्यानाकर्षण भएको भन्दै पटक पटक बस्न आग्रह गर्दा पनि विपक्षी अवरोध कायमै रहेपछि आजको बैठक आधाघण्टाका लागि स्थगित गरे।
