प्रधानमन्त्री केपी शर्मा ओलीले पछिल्लो राजनीतिक परिस्थितिबारे छलफलका लागि सत्तापक्षमा रहेका दलका शीर्ष नेताहरुसँग बैठक राखी छलफल सुरु गरेका छन्।
विशेषगरी पछिल्लो समय पूर्वराजावादी शक्तिहरुले संविधान र व्यवस्था उल्ट्याउने उद्घोष गर्दै आन्दोलनको तयारीसँगै प्रतिपक्षमा रहेका दलहरु पनि सडक प्रदर्शनको तयारी गरिरहेकै बेला नेपाल विद्युत प्राधिकरणका निस्कासित कार्यकारी निर्देशक कुलमान घिसिङको पक्षमा सडकमा देखिएको विरोध लगायतका विषयमा प्रधानमन्त्री ओलीले सत्तापक्षका नेताहरुलाई छलफलमा बोलाएका हुन्।
मंगलबार पनि बैठक बोलाएर छलफल गरेका ओलीले आजको बैठकमा सत्ता साझेदार दल नेपाली कांग्रेसका सभापति शेरबहादुर देउवासहितका नेताका अतिरिक्त जनता समाजवादी पार्टी नेपालका अध्यक्ष उपेन्द्र यादवलाई पनि सहभागी गराएका छन्।
उक्त बैठकमा जनमत पार्टीका सिके राउत, नागरिक उन्मुक्ति पार्टीकी रञ्जिता श्रेष्ठ चौधरी, लोकतान्त्रिक समाजवादी पार्टीका महन्थ ठाकुर जसपाका अशोक राई लगायतका नेताहरु सहभागी रहेको प्रधानमन्त्री कार्यालय स्रोतले बताएको छ।
उता घिसिङको वर्खास्तीको विषयलाई लिएर संसदमा रहेका सबै विपक्षी दल र सांसदहरु विरोधमा उत्रिएका छन्।
उनीहरुले आज बिहान ११ बजेका लागि डाकिएको बैठकमा घिसिङमाथि भएको कारबाहीको विरोधबारे सदन र जनतालाई स्पष्ट जानकारी दिन प्रधानमन्त्री ओली उपस्थित हुनु पर्ने र अन्यथा सदन चल्न नदिने भनि अवरोध सृजना गरेपछि अहिले सभामुख देवराज घिमिरेले आधाघण्टाको लागि बैठक स्थगित गर्दै सत्ता र प्रतिपक्षी दलका नेताहरुसँग अनौपचारिक छलफल सुरु गरेका छन्।
