नेपाल विद्युत प्राधिकरणका नवनियुक्त कार्यकारी निर्देशक हितेन्द्रदेव शाक्यले पदभार ग्रहण गरेका छन्।
मंगलबार साँझ प्राधिकरणमा पुगेर नवनियुक्त कार्यकारी निर्देशक शाक्यले पदभार ग्रहण गरेका हुन्।
सरकारले निवर्तमान कार्यकारी निर्देशक कुलमान घिसिङलाई पटक पटक सोधेका स्पष्टिकरणहरुको चित्तबुझ्दो जवाफ नदिएको भन्दै सोमबारको मन्त्रिपरिषद बैठकबाट उनलाई हटाएर रिक्त स्थानमा शाक्यलाई नियुक्त गरेको थियो।
घिसिङको वर्खास्तीको विरोधमा सदनदेखि सडकसम्म सरकारको चर्को विरोध र आलोचना भइरहेकाबेला उनलाई प्रतिस्थापन गर्दै प्राधिकरणको नेतृत्व लिन पुगेका शाक्यलाई प्राधिकरण मुख्यालयमा मंगलबार साँझ पुग्दा त्यहाँ रहेका कर्मचारीहरुको भिडले भने स्वागत गर्दै पुष्पगुच्छा, माला र खादा लगाएर स्वागत गरे।
पदभार ग्रहण गरेपछि शाक्यले आफुले न्याय पाएको दाबी गरे।
तत्कालीन प्रधानमन्त्री केपी शर्मा ओली नेतृत्वको सरकारले प्राधिकरणको कार्यकारी निर्देशकमा नियुक्त गरेको चार महिना बित्न नपाउँदै ०७८ साउनमा तत्कालीन सरकारले उनलाई पनि हटाएर घिमिसङलाई पुनःनियुक्ति गरेको थियो।
जसको विरुद्धमा शाक्यले अदालतको ढोका ढकढक्याएपनि मुद्दाको किनारा समयमै लाग्न नसक्दा उनको चारवर्षे कार्यृकाल त्यत्तिकै सकिएको थियो।
आफूले यसअघिको आफ्नो नियुक्तिका क्रममा तयार पारेको योजना अनुसार प्राधिकरणलाई अघि बढाउने शाक्यले बताए।
उनले प्राधिकरणभित्र रहेका समस्यालाई सामूहिक रुपमा समाधान गर्ने जिकिर गर्दै घिसिङको बहिर्गमन पश्चात मुलुकमा फेरि लोडसेडिङ हुने हल्ला निराधार मात्रै रहेको बताए।
उनले जनताको घरमा अव लोडसेडिङ नहुने आश्वासन दिँदै अबको दुईहप्ताभित्र केहि सकारात्मक नजिता देखिने गरि काम गर्ने बचनबद्धता पनि व्यक्त गरे।
शाक्यले डेडिकेटेड र ट्रंकलाइन बक्यौताका बिषयमा प्रक्रियागत ढंगले समाधान निकाल्ने दावी समेत गरे।
सोमबार बसेको मन्त्रिपरिषद् बैठकले कुलमान घिसिङलाई हटाएर शाक्यलाई प्राधिकरणको कार्यकारी निर्देशकमा नियुक्त गरेको थियो।
