हिमाल दैनिक
संसदको दोस्रो बैठक पनि अवरुद्ध, संवैधानिक परिषद सम्बन्धी विधेयक पास गर्ने प्रक्रियामा ब्रेक लाग्यो

प्रतिनिधि सभाको बुधबारको दोस्रो बैठकमा पनि प्रतिपक्षी दलका सांसदहरुले अवरुद्ध पारेका छन्।

नेपाल विद्युत प्राधिकरणका पूर्व कार्यकारी निर्देशक कुलमान घिसिङको वर्खास्तीको विरोधमा सडकदेखि सदनसम्म आवाज उठाउने निर्णय गरेका विपक्षी दलका सदस्यहरुले बुधबार अपरान्ह ३ बजेपछि सुरु भएको दोस्रो बैठकमा पनि उभिएर विरोध जनाउँदै अवरोध गरेपछि सभामुख देवराज घिमिरेले आजका लागि पूर्वनिर्धारित कार्यसूचिमा प्रवेश नै नगरी बिहिबार ११ बजेसम्मका लागि बैठक स्थगित गरे।

यसअघि आजै बिहान ११ बजेपछि सुरु भएको पहिलो बैठकमा पनि सरकारले दुई तिहाईको दम्भ घिसिङलाई निस्कासन गर्न दुरुपयोग गरेको आरोप लगाउँदै यसबारे सदन र जनतालाई प्रधानमन्त्री केपी शर्मा ओलीले जवाफ नदिएसम्म सदन चल्न नसक्ने अडान लिएका थिए।

पहिलो बैठकमा जस्तै सभामुख घिमिरेले विपक्षी सदस्यहरुलाई बसेर सदनको कारबाही अगाडि बढाउने वातावरण निर्माण गर्न आग्रह गरेपनि विपक्षी दलका सदस्यहरु तयार नभएपछि बैठक स्थगित गरे।

विपक्षी दलका सदस्यहरुले सरकारलाई सदनमा उपस्थित भएर आफ्नो माग बमोजिम जवाफ दिन रुलिङको माग गरेपनि सभामुख घिमिरेले सदस्यहरु उभिएर विरोध र अवरोध गरिरहेकै बेला यसबारे आफ्नो ध्यानाकर्षण भएपनि रुलिङका लागि बसिर सदनको कारबाही सुचारु गर्न दिनुपर्ने बताए।

तर, विपक्षी सदस्यहरले उनको कुरा नसुनेपछि सभामुखले भोलिसम्मका लागि बैठक स्थगित गरे।

जसको कारण विगत लामो समयदेखि अपूर्ण अवस्थामा रहेको संवैधानिक परिषदको काम, कर्तव्य र अधिकार सम्बन्धी ऐनलाई संशोधन गर्न बनेको विधेयकमाथि राज्य व्यवस्था समितिले पारित गरि पठाएको प्रतिवेदन पेश गर्दै उक्त विधेयक पारित गराउने कार्यसूचि पनि प्रभावित भएको छ।

०७७ साल पुसमा तत्कालीन प्रधानमन्त्री केपी शर्मा ओलीले जारी गरेको अध्यादेशको मार्फत खारेजीमा परेका केही दफाहरु अहिलेसम्म रिक्त रहेको कारण कतिपय संवैधानिक निकायका पदाधिकारी नियुक्तिको प्रक्रियामा समस्या उत्पन्न हुँदै आएको छ।
 

प्रकाशित मिति: बुधबार, चैत १३, २०८१
प्रतिक्रिया दिनुहोस्
साताको लोकप्रीय
Weather Update