प्रधानमन्त्री केपी शर्मा ओलीले कुलमान घिसिङलाई हटाएको बिषयमा जवाफ दिइरहन आवश्यक नरहेको बताएका छन्।

नेपाल विद्युत प्राधिकरणका कार्यकारी निर्देशक कुलमान घिसिङलाई हटाएको विषयमा संसदमा रहेका विपक्षी दलहरुले मोर्चाबन्दी गर्दै यसबारे प्रधानमन्त्रीले चित्तबुझ्दो जवाफ नदिँदासम्म सदनको कारबाही अघि नबढ्ने भन्दै अवरोध गरेलगत्तै प्रधानमन्त्री ओलीले यस्तो अभिव्यक्ति दिएका हुन्।

राष्ट्रिय युवा सङ्घ नेपालले बुधबार काठमाडौंमा आयोजना गरेको राष्ट्रिय स्वयंसेवक भेलालाई सम्बोधन गर्दै प्रधानमन्त्री ओलीले सरकारले एउटा कर्मचारीलाई हटाएर अर्कोलाई नियुक्त गरेको भन्दै अब यो विषय सिद्धिएको बताए।

घिसिङको वर्खास्तीको विषयलाई लिएर नेकपा माओवादी लगायतका विपक्षी दलले सदनदेखि सडकमा गरेको विरोधप्रति लक्षित गर्दै ओलीले भने, ‘सरकारले एउटा कर्मचारी निकाल्यो अरे, ठूलो घाटा परेछ कसैलाई छाती पिटीपिटीकन रोएका छन्। एउटा कर्मचारीलाई कारबाही गर्यो अरे सरकारले, त्यसको विधि अर्को होला नि। पाल्र्यामेन्ट बन्द गरेका छन्। प्रधानमन्त्रीले आएर जवाफ दिनु पर्यो अरे, जवाफ दिइसक्यो प्रधानमन्त्रीले। सिद्धियो नि त अब, कहाँ पाल्र्यामेन्टमा जवाफ दिइरहने? थाहा पाइएन? एउटा हटायो, अर्को नियुक्त गर्यो, सिद्धियो।’

सरकारले एउटा कर्मचारी हटाएको विषयलाई लिएर विपक्षीहरुले गरेको मोर्चाबन्दीप्रति कटाक्ष गर्दै भने, ‘यसमा पनि फेरि मोर्चाबन्दी, वा! को को भन्नुहुन्छ उहाँहरुले त्यही कर्मचारी, के के भनेर चलाउनु हुन्छ त्यसैगरी चलिदिने कर्मचारी राखिदिने? सरकारलाई असहयोग गने? नटेर्ने, व्यवसाय अप्ठ्यारोमा पार्ने? को को छन्, त्यस्तो राखिदिनु पर्ने?’
उनले कर्मचारीको अनुशासनहिनता, अराजकता र राष्ट्रिय घाटा सहनु पर्ने सरकारले भन्दै विपक्षीहरुले अहिले के के न इस्यू पायौँ भनेर बोकिहिडेको आरोप पनि लगाए।

विपक्षी दलको नियत र रणनीति आफूले बुझेको बताउँदै उनले देशलाई एक पाइला अघि बढ्न नदिएर कानून पास हुन नदिनका निमित्त कुलमानको बहानामा संसद अवरुद्ध गरेको आरोप पनि लगाए।

यही चैत १८ गतेभित्र संसदमा विचाराधिन प्रतिस्थापन विधेयकहरु पारित भएनन् भने कानून नबन्ने स्थितिलाई बुझेर नै त्यी विधेयक पास हुन नदिनका लागि संसद अवरुद्ध पार्ने खेल भइरहेको पनि उनले बताए।

यसरी उक्त विधेयकहरु पारित नभएको स्थितिमा किसान, गरिव सुकम्बासी र व्यवसायीका समस्या समाधान नहुन दिनका लागि यस्ता गतिविधिमा विपक्षी लागेको भन्दै यस्ता गतिविधिमा नलाग्न पनि आग्रह गरे।

उनले भने, ‘म आग्रह गर्न चाहन्छु, प्रतिपक्षीलाई कि यति सस्तो, यति हल्का, यति उत्ताउलो, नहुनुहोस्, तपाइहरु। र प्रधानमन्त्रीको सम्बन्धमा जथाभावी पनि नबोल्नुहोस्’

उनले विपक्षी दलको पृष्ठभूमि आफूहरुलाई थाहा भएको भन्दै विगतमा के गर्न, कता हिडेर के के गरेका थिए सबै थाहा भन्दै थपे, ‘कोही चिहानबाट नलिखुट्टाका हाडहरु निकालेर फिरी लगाउँदै र कोही आफ्ना अनेक असफलताका पिडा, तड्पन र कुण्ठाहरु बोकेर ति कण्ठा र तड्पन फ्याक्ने, पोख्ने र छर्ने थलो बनाउन खोज्दै हुनुहुन्छ। त्यो हामीले बुझेका छौँ।’

प्रधानमन्त्री ओलीले यस्ता क्रियाकलाप नगर्दा हुन्छ भन्दै के के न ठूलो अपराध गरेजस्तो गरी विपक्षी नेताहरुले अभिव्यक्ति दिएको बताए।

‘मैले यो कुरा सुनेँ, थाहा पाएँ, यो कुरा गलत होस् असत्य होस्’ भनि विपक्षी नेताहरुले दिएको अभिव्यक्तिप्रति कटाक्ष गर्दै उनले भने, ‘वाह, कुनै महान ठूलो कुरा जस्तो, कसैले के के न ठूलो भ्रष्टाचार गरेजस्तो यो असत्य होस्’ भन्दै उनीहरुले होइन रहेछ भने, नत्र भनि बोलेकोमा पनि रोष प्रकट गरे।

उनले थप्दै भने, ‘म भन्दिन चाहन्छु, चिसै पानीले नुहाउनु हुन्छ अन्त्यमा। नत्र, सत्रको काम छैन।

उनले देशलाई पछाडि पर्काउने भ्रम छर्न चाहन्छ भने त्यसमा सरकारले असफल पार्ने भन्दै कोही प्रतिगामी शक्ति टाउको जुधाउन आएमा वा विकास विरोधीहरुले काममा अवरोध खडा गरेमा सशक्त प्रतिवाद गर्न युवा संघलाई निर्देशन पनि दिए।