प्रतिपक्षी दलले बुधबारदेखि अवरुद्ध गर्न सुरु गरेको संघीय संसदका दुबै सदनको बैठक सत्ता र प्रतिपक्षी दलका शीर्ष नेताहरुको हठका कारण बिहिबार पनि अन्यौलतामा धकेलिएको छ।
विशेषगरी नेपाल विद्युत प्राधिकरणका निवर्तमान कार्यकारी निर्देशक कुलमान घिसिङलाई सरकारले सोमबारको मन्त्रिपरिषद बैठकबाट वर्खास्त गरेको विषयलाई लिएर विपक्षी दलका सदस्यहरुले यसबारे प्रधानमन्त्रीले सदनसमक्ष उपस्थित भएर चित्तबुझ्दो जवाफ नदिँदासम्म चल्न नसक्ने भन्दै विरोधमा उत्रिएपछि बुधबारको संसद बैठक सुरु भएपनि सुचारु हुन सेकेको थिएन।
आज बिहान ११ बजेका लागि प्रतिनिधि सभाको बैठक राखेका सभामुख देवराज घिमिरेले संसदको गतिरोध अन्त्यका लागि बिहानैदेखि सबै दलका प्रमुख सचेतक, सचेतक र पार्टी नेताहरुसँग बैठक राखेर सदनको अवरोध हटाउने उपायको खोजि गरेका थिए।
तर, उक्त छलफलमा पनि प्रमुख प्रतिपक्षी दल नेकपा माओवादी केन्द्र लगायतको विपक्षी मोर्चाले कुलमानको विषयमा प्रधानमन्त्री केपी शर्मा ओली स्वयं सदनमा उपस्थित भएर जवाफ नदिँदासम्म बैठकको अवरोध नहट्ने अडानमा अडिग रहिरहे।
तर, उता सत्तारुढ दल नेकपा एमाले अध्यक्ष एवं प्रधानमन्त्री ओलीले हिँजै एउटा सार्वजनिक कार्यक्रममार्फत सरकारले एउटा अटेर कर्मचारीलाई अनुशासनको कारबाही गर्दै हटाएर अर्कोलाई नियुक्त गरिसकेपछि त्यसबारे संसदमा जवाफ दिइरहनु नपर्ने भन्दै विपक्षी दललाई थप आक्रोसित बनाएका थिए।
यसरी सत्ता र प्रतिपक्षी दलका नेता, सांसदहरु आफ्नो अडानमा टसको मस नभइ अडिन पुगेपछि आजको प्रतिनिधि सभाको बैठकको अवरोध नहट्ने अवस्था उत्पन्न भएको हो।
यो समाचार तयार पार्ने बेला १२ः४५ बजेसम्म पनि सदनको गतिरोध अन्त्य हुने छाटकाँट देखिएको छैन।
यस्तो अवस्थामा सभामुख घिमिरेसामु तीन वटा विकल्प रहेका छन्। जसमा पहिलो विपक्षी दललाई विगतका कतिपय बैठकमा जस्तै मर्यादा पालकको बाक्लो घेराभित्र राखेर नाराबाजी र होहल्लाकैबिच सदनको कारबाही अघि बढाउने। दोस्रो अझै पनि सहमतिको खोजी गर्न बैठकको निर्धारित समय भन्दा २ घण्टा अगाडि अर्को सूचना प्रकासित गरेर अपरान्हका लागि बैठकको समय तोक्ने। तेस्रो, आजको बैठक पनि चल्न नसक्ने अवस्थामा सूचना टाँस गरी अर्को दिनलाई बैठक बोलाउने।
