नेपाली कांग्रेसका सभापति शेरबहादुर देउवाले सङ्क्रमणकालीन न्यायसम्बन्धी बिषयलाई टुङ्गोमा पुराउन कांग्रेस प्रतिवद्ध रहेको बताएका छन्।
बिहीबार काठमाडौंमा आयोजित सङ्क्रमणकालीन न्यायसम्बन्धी राष्ट्रिय सम्मेलनमा बोल्दै सभापति देउवाले द्वन्द्वकालमा भएका मानव अधिकार उल्लंघनका घटनाहरुको छानविनमार्फत सत्यतथ्य उजागर गरी पीडितलाई न्याय दिलाउदै सङ्क्रमणकालीन न्यायसम्बन्धी बिषयलाई टुङ्गोमा पुराउन कांग्रेस प्रतिवद्ध रहेको बताएका हुन्।
पीडितलाई न्याय दिने कुरामा दुई मत नरहेकाले वर्तमान सरकार शान्ति सम्झौताका बाँकी काम पूरा गर्न अघि बढिरहेको उनले बताए।
सभापति देउवाले सङ्क्रमणकालीन न्यायका बिषयलाई नेपालले आफ्नै घरभित्रबाट समाधान गरेर विश्वका लागि उदाहरणीय बन्न सक्नुपर्ने धारणा पनि राखे।
उनले सक्रमणकालीन न्यायसम्बन्धी आयोगको पदाधिकारिको नियुक्तिका लागि सिफारिस समिति गठन गरिसकेको भन्दै आयोगले शान्ति सम्झौंताका मर्म अनुसार सशस्त्र द्वन्द्वका क्रममा भएका मानव अधिकार उल्लंघनका विषयमा सत्यतथ्य अनुसन्धान सुरु गरेर न्याय दिलाउने विश्वास पनि व्यक्त गरे।
यसैगरी कार्यक्रममा नेकपा माओवादी केन्द्रका अध्यक्ष पुष्पकमल दाहालले शान्ति प्रक्रियालाई निष्कर्षमा पुर्याउनका लागि एक हुनुको बिकल्प नरहेको बताए।
राजनीतिक दलहरुबीच पनि शान्ति प्रक्रियाका बिषयमा कुनै विवाद नरहेको भन्दै शान्तिप्रक्रियालाई निष्कर्षमा पुर्याउनका लागि एक हुनुको बिकल्प नरहेको बताएका हुन्।
उनले सङ्क्रमणकालीन न्यायको बिषय राष्ट्रिय मुद्दा भएकाले यसमा अन्य राजनीतिक प्रभाव पर्न दिन नहुने जिकिर गरे।
दाहालले सङ्क्रमणकालीन न्यायका बिषयका कुनै राजनीतिक तिक्तता बढोस् भन्ने चाहना आफ्नो नरहेको भन्दै प्राविधिक, कानूनी र राजनीतिक उतारचढावका कारण शान्ति प्रक्रियालाई निष्कर्षमा पुर्याउन ढिलाई भएको उनको भनाइ छ।
दाहालले नेपालको शान्ति प्रक्रिया धेरै हदसम्म आफ्नो मौलितकता अनुसार सफलताको साथ अगाडि बढिरहेको महशुस गरेको भन्दै पीडितहरूलाई न्याय दिने कुरालाई प्राथमिकता दिएर मात्र शान्ति प्रक्रियालाई दिगो बनाउन सकिन्छ भन्ने कुरामा कुनै अन्यौल नरहेको पनि बताए।
