गणतन्त्र पक्षधर र राजावादीको बेग्लाबेग्लै प्रदर्शनका कारण काठमाडौं उपत्यका भित्र यातायात सेवा प्रभावित भएको छ।
दुबै पक्षको र्याली र सभाका कारण काठमाडौंका मुख्य सडकमा सार्वजनिक सवारी साधानसँगै निजी सवारीसाधनको यातायात प्रभावित भएको हो।
पूर्वपञ्च र दरबारिया शक्तिहरुले दोस्रो जनआन्दोलनको बलबाट सत्ताच्यूत हुन पुगेका पूर्व राजा ज्ञानेन्द्र शाहलाई पुनःस्थापित गराउने उद्घोष गर्दै आज उपत्यकामा प्रदर्शनको तयारी गरेसँगै संसदमा प्रमुख प्रतिपक्षी दल नेकपा माओवादीसहितका कम्युनिष्ट घटकहरु सम्मिलित समाजवादी मोर्चा नेपालले पनि काठमाडौँको प्रदर्शनीमार्गमा आयोजना गरेको सभाका कारण सो क्षेत्रमा यातायात आवागमन बन्द गरिएको हो।
काठमाडौं जिल्ला प्रशासन कार्यालय र महानगरीय प्रहरी कार्यालयले दुबै पक्षको कार्यक्रम बेग्लाबेग्लै स्थानमा गराउने उद्देश्यले पूर्व राजावादीहरुलाई तीनकुनेस्थित खुला चौरमा र समाजवादी मोर्चालाई भृकुटीमण्डपमा कार्यक्रम गर्न स्थल तोक्दै सोही मुताविक सडक प्रदर्शनको मार्ग दिएको छ। ताकि उनीहरुबिच सडकमा जम्काभेट र मुठभेड नहोस् र शान्ति सुरक्षाको अवस्थामा खलल नपुगोस्।
रत्नपार्कदेखि भद्रकालीसम्म र प्रदर्शनीमार्ग, भृकुटिमण्डपको सडक पूणरुपमा बन्द गरिएको छ। त्यस्तै काठमाडौंको तीनकुने वानेश्वर, माइतिघर लगाएतका क्षेत्रमा यातायात अवरुद्ध भएको छ। सो क्षेत्रको यातायात प्रभावित भएपछि सवारी साधनलाई डाइभर्ट गरिएको छ। जसका कारण अन्य क्षेत्रमा सवारी जाम भएको ट्राफिक प्रहरीले जनाएको छ।
