पूर्वपञ्च, दरबारियासँगै गणतन्त्रको विरुद्धमा सडक आन्दोलनमा उत्रिएको अनियन्त्रित भिडले काठमाडौंको तीनकुनेस्थित एक सर्वसाधारणको घरमा आगो लगाइदिएका छन्।
नयाँ संविधान र यसले व्यवस्था गरेको संघीय लोकतान्त्रिक गणतन्त्रिक व्यवस्थालाई अन्त्यगर्दै पुनः निस्कासित पूर्व राजा र हिन्दुअधिराज्य घोषणाको माग गर्दै प्रदर्शनमा उत्रिएको नेतृत्वहिन भिडले शुक्रबार अपरान्ह तीनकुनेस्थित सर्वसाधारणका घरमा ढुंगा र इट्टा प्रहार गरी घरका सिसा फुटाइदिएका थिए।
प्रहरी प्रशासनले तोकिदिएको स्थानमा विरोध सभामा सहभागी हुन आएका प्रदर्शनकारीले नयाँवानेश्वरतर्फको निषेधित क्षेत्र तोड्न प्रयास गर्दै सुरुमा प्रहरीसँग झडप गरेका थिए। त्यसपछि प्रहरीले स्थिति नियन्त्रणमा लिन लाठीचार्ज गर्नुका साथै केही राउण्ड अश्रुग्याँस सेल र पानीको फोहोरा प्रयोग गर्दै भिडलाई तितरबितर बनाएको थियो।
प्रहरीसँगको मुठभेडबाट थप आक्रोसित बनेको भिडले नजिकै रहेका घरका सिसामा ढुंगा प्रहार गर्दै त्यी घरबाट प्रहरीले अश्रुग्याँसका सेल प्रहार गरेको आरोप लगाउँदै ढुंगा प्रहार गरि तोडफेट गरे।
त्यतिले नपुगेर अनियन्त्रित भिडले उक्त निजी घरमा प्रवेश गर्दै त्यहाँ रहेका फर्निचर तथा कागजात सडकमा ल्याएर जलाएलगत्तै घरमा पनि आगो लगाइदिएका छन्।
गत फागुन ६ गते पूर्वराजा ज्ञानेन्द्र शाहले फागुन ७ गतेको प्रजातन्त्र दिवसका दिन सार्वजनिक रुपमा आफूलाई साथ दिन गरेको आग्रहपश्चात एकत्रित हुन पुगेका पूर्वपञ्च, दरबारिया राजावादी र मेडिकल व्यवसायी दुर्गा प्रसाई लगायतका व्यक्तिहरुले राजसंस्थाको पुनःस्थापना र हिन्दु राज्यको स्थापनाका लागि संघर्षको घोषणा गर्दै अघि बढेका थिए।
जसमा एकाएक तत्कालीन राष्ट्रिय पञ्चायतका अध्यक्ष नवराज सुवेदीको नेतृत्वमा गठन भएको जनआन्दोलन कमिटीले प्रसाईलाई नेतृत्वकर्ताको भूमिका दिएपछि आजको कार्यक्रम उनैको नेतृत्वमा तीनकुनेमा हुने तयारी भएको थियो।
जहाँ सहभागी हुन पुगेका प्रसाई र उनको पछुवा गाडीले सुरुमा सुरक्षा घेरा तोड्न खोजेपछि स्थिति एकाएक तनावग्रस्त हुन पुगेको थियो।
त्यसपछि कतिपय कार्यक्रममा सहभागी हुन पुगेका नेताहरु मञ्चबाट बाहिरिन पुगे भने त्यसपछि स्थिति सामान्य गर्ने कोशिश गर्दै प्रसाईले आफ्ना समर्थकहरुलाई कार्यक्रममा शान्तपूर्ण वातावरणमा बस्न आग्रह गरिरहेपनि भिड उनको नियन्त्रण बाहिर जान लागेको छ।
