समाजवादी मोर्चा नेपालले राजावादीको क्रियाकलापको सशक्त ढंगले प्रतिवाद गर्ने जनाएको छ।
शनिबार नेकपा एकीकृत समाजवादीको पार्टी कार्यालयको अवस्थाबारे जानकारी लिदै समाजवादी मोर्चाका नेताहरुले राजावादीको क्रियाकलाप अपराधिक भएको भन्दै सशक्त ढंगले त्यसको प्रतिवाद गर्ने जनाएको हो।
नेकपा माओवादी केन्द्रका अध्यक्ष पुष्पकमल दाहालले राजावादीको छाडातन्त्रलाई छुट दिन नसकिने बताए।
उनले पत्रकारहरुसँग प्रतिक्रिया दिँदै हिँजोको घटनाको पछाडिको कारक पूर्व राजा ज्ञानेन्द्र शाह नै भएको दाबी गर्दै थपे, ‘ज्ञानेन्द्र शाहको मानसिकता नै आपराधिक छ भन्ने कुरा इतिहासमा देखिएको र अहिले पनि देखिएको छ।’
विगतमा सहमति र शान्तिपूर्ण तबरले राजतन्त्रको अन्त्य गरेपनि दाहालले थप्दै भने, ‘यहि नै सही समय हो, सरकारले कडा कदम चालोस्। अपराधीहरु सबैलाई छानविन गरी कारबाहीको दायरामा ल्याओस्। र ज्ञानेन्द्र शाहलाई पनि छाडा हुने छुट दिन सकिँदैन। नेपाली जनता त्यसको लागि तयार छैन।’
उनले हिँजोको घटनामा सरकार र प्रहरीको राम्रो तयारी नदेखिएको र ठूलो जनधनको क्षति भएको बताए। राजधानीको मुटुमा यस्तो तोडफोड र आगजनी हुँदा पनि सुरक्षाकमीको परिचालन समयमै हुन नसक्दा अनपेक्षित क्षति व्यहोर्नु परेको पनि बताए।
दाहालले काठमाडौंमा विवेकहीन र आपराधिक घटना हुँदा सुरक्षा निकाय समयमै उपस्थित हुन नसक्ने अवस्थाको सरकारले गम्भीर रूपमा समीक्षा गर्नुपर्ने पनि बताए।
त्यस्तै नेकपाका महासचिव नेत्रबिक्रम चन्द बिप्लवले राजावादीको क्रियाकलाप अपराधिक रहेकाले सशक्त ढंगले प्रतिवाद गर्ने बताए।
राजावादी समर्थकहरुले शुक्रबार नेकपा एकीकृत समाजवादीको पार्टी तोडफोड गर्दै आगजनी गरेका थिए।
