नेपाल पत्रकार महासंघले पत्रकार सुरेश रजकको मृत्युको सत्यतथ्य पत्ता लगाएर दोषीमाथि कडा कारबाही गर्न राज्यसँग माग गरेको छ।
पूर्वराजावादीहरुका समर्थकहरूको हिंसात्मक आन्दोलनमा परी शुक्रबार तीनकुनेमा मृत्यु भएका पत्रकार तथा सञ्चारकर्मी सुरेश रजकप्रति श्रद्धाञ्जली अर्पण गर्न माइतीघर मण्डलामा शनिबार आयोजित कार्यक्रममा महासंघले घटनाको सत्यतथ्य पत्ता लगाएर दोषीमाथि कडा कारबाहीको माग गरेको हो।
शुक्रबार पूर्वराजा समर्थकहरूको समूहले गरेको आन्दोलनको भिडिओ खिच्ने क्रममा एभिन्युज टेलिभिजनका क्यामेरापर्सन रजकको जलेर मृत्यु भएको थियो।
प्रहरी र आन्दोलनकारीबिचको झडप तथा राजावादीको कार्यक्रम भिडियोमा खिच्न तीनकुनेस्थित एक घरको माथिल्लो तलामा पुगेका रजक अनियन्त्रित र आक्रोसित भिडले घरमा लगाइदिएको आगोमा परेर जलिमरेको अवस्थामा भेटिएका थिए।
पत्रकार महासङ्घका महासचिव रामप्रसाद दाहालले घटनाको निष्पक्ष छानविन गरेर दोषीमाथि कारवाही गर्न माग गरे।
मृतक पत्रकार रजकलाई न्याय दिलाउन महासङ्घ निरन्तर लाग्ने उनले बताए।
पछिल्लो परिस्थितिका कारण महासङ्घ स्थापना दिवसका अवसरमा गर्न लागिएका पूर्वनिर्धारित सम्पूर्ण कार्यक्रम स्थगित गरी प्रदर्शनमा उत्रिएको महासङ्घले जनाएको छ।
यसैबिच पत्रकार रजकको परिवारजनले गृहमन्त्री रमेश लेखकलाई भेटी तीन बुँदे माग अघि सारेका छन्।
जसको जवाफमा गृहमन्त्री लेखकले सरकारले अबको केही दिनभित्रै आवश्यक निर्णय गरी जानकारी गराउने बताएका छन्।
