संविधान सभाको ऐतिहासिक घोषणामार्फत १६ वर्षअघि उन्मूलन भएको राजसंस्थाको पुनःस्र्थापना र हिन्दु अधिराज्यको कायम गर्ने उद्दघोषसहित गठन भएको संयुक्त जनआन्दोलनको नेतृत्व संस्कृतविद जगमान गुरुङलाई दिइएको छ।

वर्तमान संविधान र शासन व्यवस्थाको विरुद्ध राजसंस्थाको स्थापनाका लागि गठित समितिका संयोजक एवं ३५ वर्षअघि विघटित राष्ट्रिय पञ्चायतका अध्यक्ष नवराज सुवेदीलाई सरकारले गत शुक्रबारको हिंसात्मक गतिविधिको प्रमुख नेतृत्वकर्ता भएको आरोपमा उनकै निवासमा नजरबन्दको अवस्थामा राखेपछि आइतबार सुवेदीले आन्दोलनको नेतृत्व गुरुङलाई सुम्पिएका हुन्।

आइतबार एक विज्ञप्ति जारी गर्दै सुवेदीले आफ्नो अनुपस्थितिमा जनआन्दोलनको नेतृत्व जगमान गुरुङले गर्ने उल्लेख गर्दै आन्दोलनलाई निरन्तरता दिनुका साथै उक्त आन्दोलनलाई सबै दल, संघ संस्थाले सहयोग गर्न अनुरोध पनि गरेका छन्।
यसअघि चैत १५ गते काठमाडौंमा आयोजित विरोध प्रदर्शनको तयारीपूर्व विवादस्पद मेडिकल व्यवसायी दुर्गा प्रसाईलाई उक्त आन्दोलनको जनकमाण्डर तोकिएको थियो।

तर, शुक्रबार काठमाडौंको तीनकुने केन्द्रित विरोध सभा र प्रदर्शनमा सहभागी हुन पुगेका प्रसाईकै अराजक गतिविधि र सुरक्षा निकायको फितलो तयारीका कारण विरोध प्रदर्शन हिंसात्मक र अराजक बनेपछि उक्त क्षेत्रमा एक पत्रकारसहित एक युवकको ज्यान गएको थियो। यसका अतिरिक्त अराजक बनेका प्रदर्शनकारीले वानेश्वर र कोटेश्वर आसपासका सरकारी, निजी तथा सार्वजनिक सम्पत्तिमा तोडफोड, आजजनी र लुटपाट गरेपछि त्यसको आरोपमा पक्राउ हुने डरले प्रसाई फरार भएका थिए।

यसका अतिरिक्त उक्त आन्दोलनमा प्रदर्शनकारीलाई उक्साएर हिंसा भड्काएको आरोपमा सुवेदीलाई नजरबन्दमा राखेको सरकारले राष्ट्रिय प्रजातन्त्र पार्टीका नेताद्वय रविन्द्र मिश्र र धवलशम्शेर जबरालाई हिरासतमा राखिसकेको छ।

राजसंस्थाको विधिवत अन्त्यपूर्वदेखि नै राजसंस्था र हिन्दुधर्मको वकालत गर्दै सदनदेखि सडकसम्म निरन्तर जुध्दै आएको संगठित संस्था राष्ट्रिय प्रजातन्त्र पार्टी र यसको वैधानिक नेतत्वलाई पूर्व राजा ज्ञानेन्द्र शाहदेखि पूर्व दरबारियाहरुले अहिलेसम्म पनि विश्वास गर्न नसक्दा उक्त आन्दोलनको नेतृत्व सुवेदी, प्रसाई र गुरुङको हातमा पुगेको छ भने राप्रपा नेता, कार्यकर्ता उनीहरुका सहयोगीको रुपमा प्रस्तुत हुँदैछन्।