नेपाली कांग्रेसका महामन्त्री विश्वप्रकाश शर्माले पूर्वराजा ज्ञानेन्द्र शाहमा संवैधानिक राजा बन्ने क्षमता नभएको दाबी गरेका छन्।
प्रतिनिधि सभा बैठकको विशेष समय सोमबार शर्माले इतिहासको कालखण्ड हेर्दा नेपालमा संवैधानिक राजसंस्थाका लागि ज्ञानेन्द्र शाहमा क्षमता, योग्यता र चरित्र नभएको बताए।
सामान्य नागरिक बनाएर राखेको व्यक्तिको चरित्र तीनकुने घटनामा देखिएको भन्दै गद्दीमा भएको भए के अवस्था बन्थ्यो होला भन्ने सोच्न नसकिने धारणा राखे।
विगत लामो समयदेखि संवैधानिक राजतन्त्र र संसदीय लोकतन्त्रको वकाल गर्दै आएको कांग्रेसको तितो अनुभवका आधारमा पनि वर्तमान राजा संवैधानिक भएर राजा बस्न सक्छन् भन्ने कुरामा सत्यता नभएको भन्दै यसबारे भ्रमबाट मुक्त हुन सबैलाई उनले आग्रह गरे।
त्यस्तै शर्माले तीनकुनेमा भएको घटनामा सहानुभूतिसमेत जनाउन नसक्ने राजा किन फर्काउन पर्यो भन्दै प्रश्न समेत गरे।
उनले अहिलेका व्यवस्थाप्रति नागरिकमा देखिएको असन्तुष्टि अहिलेकै प्रणालीबाट समाधान गर्नुपर्नेमा जोड पनि दिए।
उनले विद्युत प्राधिकरणका कार्यकारी निर्देशक कुलमान घिसिङलाई हटाएको बिषय अदालतमा गइसकेको अवस्थामा प्रधानमन्त्रीले सदनमा आएर जवाफ दिनु उचित भएको बताए।
यद्दपी कुलमानलाई हटाउने बिषयमा आफुहरुको बिमती कायमै रहेको उनको भनाइ छ।
