राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङदेनले राजा हटाएर देशमा लोकतन्त्रको नाममा लुटतन्त्र मच्चाएको आरोप लगाएका छन्।
सोमबार प्रतिनिधि सभाको बैठकमा बिशेष समयमा बोल्दै लिङदेनले गणतन्त्रमा पुगेपछि मुलुक कस्तो अवस्थामा छ भन्ने जनताले राम्रोसंग हेरेको भन्दै राजा हटाएर देशमा लोकतन्त्रको नाममा लुटतन्त्र मच्चाएको आरोप लगाएका हुन्।
उनले व्यवहारमा सुधार नगरेसम्म गणतन्त्रको विरोध मात्रै नभइ जनताले व्यवस्था उल्टाउने दाबी पनि गरे।
लिङदेनले १५ गते तीनकुनेमा भएको हिंसात्मक घटनालाई राज्यले नियन्त्रणमा लिन नसकेको र उल्टै नागरिकमाथि सरकारले दमन गरेको आरोप पनि लगाए।
हरेक आन्दोलनमा युवाहरूको योगदान रहने भन्दै युवाशक्तिलाई नहोच्याउन उनले चेतावनी दिए।
त्यस्तै अध्यक्ष लिङदेनले शुक्रबार भएको घटनाको निष्पक्ष छानविनका लागि न्यायीक आयोग गठन हुनुपर्ने माग गरे।
यसअघि विभिन्न विषयका अतिरिक्त तीनकुने घटनाको बारेमा जानकारी दिनेक्रममा प्रधानमन्त्री केपी शर्मा ओलीले पूर्वराजा ज्ञानेन्द्र शाह र उनका समर्थकप्रति गरेको टिप्पणीप्रति राप्रपा सांसद ज्ञानबहादुर शाहीले आपत्ति प्रकट गर्दै सदनमा केही समय अवरोध सृजना गर्न खोजेका थिए।
शाहीलाई साथ दिँदै राप्रपा सांसदहरुले उभिएर पूर्वराजा ज्ञानेन्द्र शाहका बिषयमा प्रधानमन्त्रीले दिएको अभिव्यक्ति सदनको रेकर्डबाट हटाउन माग समेत गरे।
प्रधानमन्त्री ओलीले सम्बोधनका क्रममा पूर्व राजा ज्ञानेन्द्र शाहले विगत एक वर्षदेखि निरन्तर गरेको गतिविधिमध्ये गत फागुन २५ गते त्रिभुवन विमानस्थलबाट निवास जाने क्रममा गरेको आह्वानमा भएको ‘कथित स्वागत’ भन्दै १५ गतेको घटनाको मुख्य दोषी उनै भएको भनेपछि गरेपछि राप्रपा सांसदहरुले नियमापत्ति गरेका थिए।
ओलीले बोल्दाबोल्दै सभामुखको अनुमतिविना नै होहल्ला गर्दै राप्रपा सांसद्र शाहीले पूर्वराजा ज्ञानेन्द्र शाहलाई विमानस्थलमा स्वागत गरेको विषयलाई ‘कथित’ भनेको भन्दै आपत्ति जनाउँदै उक्त शव्द रेकर्डबाट हटाउन माग गरे।
साथै उलने प्रधानमन्त्रीले होच्चाउने काम गरेको भन्दै आक्रोश व्यक्त गरेपछि उनको साथमा उभिएका राप्रपा सदस्यहरुले हल्ला गर्न थालेपछि सभामुख देवराज घिमिरेले सबैलाई बस्न र होहल्लाकाबिच नबोलेर केही समय रोक्न प्रधानमन्त्री ओलीलाई आग्रह गरेपनि प्रधानमन्त्री ओलीले सभामुखको आग्रहलाई सनेकोे नसुनै गर्दैै आफ्ना भनाई निरन्तर अघि बढाए।
राप्रपा सांसदले प्रधानमन्त्रीको अभिव्यक्तिप्रति आपत्ति जनाएपछि एमाले सांसदहरु समेत राप्रपा सांसदको विरोधमा उठेका थिए। सभामुख देवराज घिमिरेले राप्रपाले उठाएका बिषयमा ध्यानाकर्षण भएको जनाएपछि बैठक सहज ढंगले अघि बढेको थियो।
