संघीय संसदको चालु अधिवेशन आजै मध्येरातदेखि अन्त्य हुने भएको छ।

मन्त्रिपरिषदको सिफारिसमा राष्ट्रपति रामचन्द्र पौडेलले संसद सचिवालयमा पठाएको पत्र अनुसार, सभामुख देवराज घिमिरेले संघीय संसदको अधिवेशन आजै मध्यरातीदेखि अन्त्य हुने जानकारी सदनलाई गराए।

मंगलबार बिहान बोलाइएको बैठकमा यसअघि तय गरिएको सम्भावित कार्यसूचिलाई हटाएर सभामुख घिमिरेले मन्त्रिरिषदको कार्यालयबाट प्राप्त पत्र बाचन गर्नुका साथै विविध कारणले सदनको बैठकमा लगातार १० दिनभन्दा बढी अनुपस्थित भएका सदस्यहरुको अनुपस्थितिको सूचना स्वीकृत गराएका थिए।

आजको बैठकमा माघ १८ गते सुरु भएको संसदको विधेयक अधिवेशन अन्त्यको घोषणा गर्नुअघि राष्ट्रिय प्रजातन्त्र पार्टीका नेता एवं सांसद दिपक बोहोराको असामयिक निधनको सूचना दिँदै उनीप्रति शोक व्यक्त गरेपछि अधिवेशन अन्त्य भएको जानकारी गराएका थिए।